Наурызнаманың онкүндігі аясындағы «Жаңару күні» де Әулиеата жерінде сән-салтанатпен өтіп, игі істерге толы болды. Тараз қаласы әкімдігінің мемлекеттік қызметшілері және түрлі мекеме қызметкерлері «Ұлы дала» шағынауданының Көшек батыр мен Қыз Жібек көшелерінің қиылысындағы алаңқайға 140 түп түрлі көшеттер отырғызды.
Бұл жұмыстар «Жасыл желек – жердің көркі» акциясы аясында жүзеге асты. Атап айтқанда, отырғызылған жас өскіннің ішінде қара ағаш, ясин, терек, катальпа ағаштарының көшеттері бар. Игілікті іске «Жасыл ел» еңбек жасақтарының жастары да өз үлестерін қосты.
Осы күні шаһардағы «Қарасу» шағынауданы №25 үйдің ауласында «Таза аула – таза қала» акциясы өтті. Бұл игі істен тараздық мекеме қызметкерлері мен тұрғындар шет қалған жоқ. Бұл күні Тараз қаласындағы Д.Карбышев атындағы №16 орта мектептің ауласында «Мектептің 80 жылдық мерейтойына – 80 ағаш» акциясы аясында түрлі көшеттер егілді. Аталған білім ошағының алдында Тараз қалалық білім бөлімінің басшысы Раушан Қожамжарова ойымен бөлісіп: «Аталған мектептің құрылғанына биыл 80 жыл. Мерейтой аясында көптеген іс- шара өтеді. Дегенмен, тал егу акциясының орны бөлек. Бұл игі шара оқушыларға да патриоттық сезім сыйлайды», – деді. Ал, Тараз қаласының тұрғыны Дүйсен Белқожа ақсақал да жас көшеттердің егіліп жатқанына қуанышты екенін айтты. Осылайша, тараздық белсенділер «Жаңару күнінің» мән-мағынасын терең ашып, жастар мен жасөспірімдерге үлгі көрсетті.
Есет ДОСАЛЫ
Ұқсас жаңалықтар
