Мәдениет, салт-дәстүр күніне орай Тараз қаласы әкімдігінің ішкі саясат бөлімі «Жастар ресурстық орталығы» коммуналдық мемлекеттік мекемесі мен облыстық мектеп олимпиадаларын және мектептен тыс іс-шараларды өткізетін орталық бірлесіп, облыс орталығындағы Қайрат Рысқұлбеков саябағында «Қазағымның қазынасы – домбыра» атты домбыра пати ұйымдастырды.
Іс-шара жөсөспірім балаларға ұлттық құндылықтарды үйрету, оқушыларды патриоттық іске тәрбиелеу мақсатында жүзеге асты.
Іс-шарада «Бозторғай» домбырашылар оркестрінің өнерпаздары Құрманғазының «Балбырауын», Раздықтың «Салкүрең» және Әбдімомын Желдібаевтың «Ерке сылқым» күйін орындады. Олардың домбырасының шанағынан шыққан күй жиналған көпшіліктің назарын аударды. Осылайша, жиналған көпшілік домбыраның қасиетін сезіне түсті.
– Оқушы күнімізде өзім де домбыра тартып, түрлі байқауларға қатыстық. Сондықтан, өнер менің жаныма жақын. Осы домбыра патиді көрейін деп, арнайы келдім. Орындалған күйлер өте әсерлі және сапалы. Жас өрендерге менің көңілім толды. Өнерлі жастардың бағы ашылып, жұлдыздары жана берсін, – деді Тараз қаласының тұрғыны Әділхан Сағатов.
Есет ДОСАЛЫ
Ұқсас жаңалықтар
