Биылғы жыл біздің өңір кітап оқуға белсенді бетбұрыс жасады. Облыс әкімі Ербол Қарашөкеевтің бастамасымен «Әулиеата – кітап оқитын өңір» жобасы қолға алынғаны белгілі. Бұл жобаның негізгі мақсаты – өңір тұрғындарының кітапқа деген қызығушылығын арттыру, оқырман мәдениетін қалыптастыру.
Осы орайда Ы.Алтынсарин атындағы №49 мектеп-гимназиясында «Ақын – елдің ардағы» атты кездесу кеші ұйымдастырылды. Аталған кештің қонағы ретінде ақын, Қазақстан Жазушылар одағының мүшесі Нұржан Әліш арнайы шақырылды.
«Қазақ тілі мен әдебиеті» апталығына орай өлкеміздегі халықтың ыстық ықыласына бөленіп жүрген қаламгерлеріміздің өрнегі мол жырларын оқуға, олардың өнегелі өмір жолдарын өскелең ұрпаққа өнеге тұтып, жастардың кітап оқуға құлшынысын арттыру, еліне, жеріне деген сүйіспеншіліктерін нығайту, мәдениетті адам болуы үшін келешек ұрпақты рухани байлық – кітапты дәстүрлі оқи алатындай тәрбиелеуге бағытталған кездесу кешінің мәні өте жоғары болды.
Ақын іс-шара барысында өзінің шығармашылығы жайлы әңгімеге тоқталып, әдебиет әлеміндегі жетістіктерін және шығармашылық өміріндегі қиын да, қызықты сәттерін сөз етті. Сонымен қатар, бұл кездесуде ұстаздар мен оқушылар тарапынан сұрақтар қойылып, ақын тұшымды жауаптарын жолдады.
Сондай-ақ, мектеп оқушылары Нұржан Әліштің жырларын мәнерлеп оқып, іс-шара әсем ән мен күмбірлеген күйге ұласты.
Кеш соңында ақын мектеп кітапханасына өз кітаптарын сыйға тартып, көпшілікпен естелік суретке түсті.
Айгүл ИСАЕВА,
Ы.Алтынсарин атындағы № 49 мектеп-гимназиясының қазақ тілі мен әдебиеті пәнінің мұғалімі.
Ұқсас жаңалықтар
