StemCo – бұл ғылым, технология, инженерия және математика бағыттары бойынша маусымдық негізде жылына төрт рет ұйымдастырылатын халықаралық байқау. Әр елден жеңімпаз атанған жастар жылына екі рет Сингапурде өтетін жаһандық финалға жолдама алады. Аталған ғылым бәйгесіне жыл сайын әлемнің 40-тан астам елінен 10 000-нан астам оқушы қатысады. Осы арқылы Сингапурдың оқу бағдарламасына негізделген жас ерекшеліктеріне сәйкес жарысты қамтамасыз ету арқылы оқушылардың жоғары деңгейлі ойлау дағдыларын дамытуға жол ашады.

– Сингапурде өтетін StemCo Global Finals-қа қатысу мен үшін үлкен мәртебе. Бұл оқиға менің STEM бағыттарына деген қызығушылығымды және өз елімді халықаралық аренада таныстыру мүмкіндігін нығайтудағы маңызды қадам саналады. Менің ойымша, StemCo Global Finals – жастарға көп мүмкіндік ұсынатын бірегей халықаралық платформа. Мен үшін бұл жарқын болашаққа бағытталған үлкен баспалдақ. Байқау маған құнды дағдыларды дамытуға және бәсекелестік арқылы үнемі ойымды жетілдіруге мүмкіндік береді. Мен өз елімді әлемдік аренада жақсы қырынан таныстыру үшін ең жоғары нәтижелерге қол жеткізу үшін бар күшімді саламын, – дейді Нұрасыл Серіков.

Айта кету керек, бұған дейін Нұрасыл физика және жоғары математика саласы бойынша жоғары нәтижелерге қол жеткізген. Өзінің ғылымға деген қызығушылығын жас кезінен бастап көрсеткен ол көптеген академиялық байқауларға қатысып, 45-тен аса түрлі жарыстардың жүлдегері атанған. Ең соңғысы өткен жылы геометрия пәні бойынша ХІ халықаралық Иран олимпиадасынан қола медаль иеленген. Аталмыш білім додасына 1245 қазақстандық оқушы қатысқан. Жас дарын бүгінде өзі білім ататын мектебінде жасанды интеллект саласында жұмыс істейтін хаб құрып, нейрондық желілер мен OpenAI платформасын қолдану арқылы түрлі бағдарламалар жасаумен айналысады.

Талай жасқа табысты бастамаларымен үлгі болған жамбылдық жас дарынға сәттілік тілеп, Сингапурде өтетін жаһандық кезеңде табыс тілейміз!

Нұрболат АМАНБЕК