Шу аудандық мәдениет үйінде өткен өнер бәйгесіне барлығы 12 мекеме өтініш білдірген. Қатысушылар ең алдымен өздерін түрлі тәсілмен таныстырып, екінші кезеңде өз қалауларына қарай ән орындады. «Күлкі – өмір базары» атты кезеңде 5 адамнан тұратын әрбір топ көрерменге әзіл-сықақ қойылым ұсынып, күлкі сыйлады.

Есімі елге танымал композиторлардың шығармаларын насихаттауға бағытталған байқаудың тағы бір мақсаты – әуесқой өнерпаздарды өнерге, сахна мәдениетіне баулу, жаңа өнер иелерінің есімін жұртшылыққа таныту.

Байқауға тыңғылықты дайындықпен келген ұжымдар өздеріне берілген уақытта қазылар алқасының бағасын алып, жоғары ұпайларды жинауға тырысып бақты. Десе де сайыс қорытындысымен мәдениет және тілдерді дамыту бөлімінің бас маманы Қ.Файзуллина, мәдениет үйінің көркемдік жетекшісі М.Мақсұт, әнші Ә.Мұратбек және журналист Ф.Әубәкірова сынды қазылар байқау жеңімпаздарын анықтады.

Тартысты өткен жарыста Абай ауылдық мәдениет үйі бас жүлдені еншілесе, Д.Қонаев ауылдық мәдениет үйі бірінші орынды иемденді. Көктөбе мен Шоқпар ауылдық мәдени ошақтары жүлделі екінші орынға қол жеткізсе, Шу қалалық мәдениет үйі мен К.Әзірбаев атындағы орта мектебі үздік үштікті түйіндеді.

«Бұл шара әріптестердің ауызбіршілігін арттырып, ынтымағын нығайтуға таптырмас мүмкіндік. Қиындығы мен қызығы қатар жүретін жұмыста мәдени ошақ меңгерушілерінің ұйымдастырушылық қабілетін көрсететін, шығармашылығын шыңдайтын тағылымды іс-шара болды. Ұйымдастырушыларға және белсене атсалысқан әріптестеріме алғысымды білдіремін», – деді Шу ауданы әкімдігінің мәдениет және тілдерді дамыту бөлімінің басшысы Әсел Жазықбаева. Енді Абай ауылдық мәдениет үйі облыстық байқауда бақ сынайтын болады.

Есет ДОСАЛЫ

Шу ауданы