Көзіқарақты оқырманның ой түпкірінде «Шоқ тілді Шона» деп аты қалған талант иесінің бір топ шәкірттері мен оқырмандары білім ордасында орналасқан бюстке гүл шоқтарын қойып, ақын рухына тағзым етті.

Салтанатты шарада мектеп оқушылары қарымды қаламгердің шығармаларынын үзінді оқып, келушілерге әдеби-сазды композиция ұсынды.

Одан әрі іс-шараның негізгі бөлімі А.Тоқпанов атындағы Жамбыл облыстық қазақ драма театрында жалғасты. Мұнда «Шоқтығы биік Шона» атты республикалық ғылыми-практикалық конференция өтті.

Ғылыми конференцияға Жамбыл облысының әкімі Ербол Қарашөкеев, ҚР Президент кеңесшісі Мәлік Отарбаев пен Жазушылар Одағы басқарма төрағасының орынбасары Қасымхан Бегманов, сондай-ақ зиялы қауым өкілдері мен жазушының қалың оқырманы қатысты.

Конференцияда сөз алған азаматтар қазақ руханиятының жоқшысы, сақшысы, сатирик жазушы Шона Смаханұлының қаламгерлігімен қатар, қазақ тіліндегі мектептер мен балабақшалар ашу жолында тынбай күрескен қажырлы еңбегін атап өтіп, қайраткерлік қыры туралы кең көлемді баяндамалар жасады.  

Айта кетейік, бүгін Жамбыл облысы әкімдігі мәдениет басқармасының ұйымдастыруымен, «Баласағұн» орталық концерт залында Шона Смаханұлының ғасырлық мерейтойына арналған «Ер Шона» атты әдеби-музыкалық кеш өтеді.