Қазір қоғамды темір тұлпарсыз елестету мүмкін емес. Ғалымдардың зерттеуінше, қазіргі таңда әлемде 1,2 миллиардтан астам автокөлік бар. Автокөліктерден бөлінетін метан газының зардабын азайту барысында елімізде «Таза Қазақстан» экологиялық акциясы аясында автокөліксіз жүру күні белгіленген болатын. Бұл іс-шарадан Жамбыл ауданының жұртшылығы да шет қалмады.
Игілікті іске аудан тұрғындары мен жастар атсалысып, белсенділік танытты. Аудандық жастар ресурстық орталығының ұйытқы болуымен өткен бастаманың маңыздылығы туралы аталған мекеме басшысы Жандар Тоқсаба айтып өтті.
– Еліміз ластанған елдер индексі бойынша 111 елдің ішінде 30-орынға тұрақтаған. Ал, ТМД елдері бойынша Әзірбайжаннан кейін екінші орынға шықты. Бұл бейжай қарайтын мәселе емес. Мемлекет басшысы да биыл ШЫҰның төрағалығы аясында экология жайлы айрықша атап өткен болатын. Бүгінде еліміздің түкпір-түкпірінде «Таза Қазақстан» акциясы ұйымдастырылып келеді. Акция аясында біз де бір күнімізді көліксіз жүруге арнадық. Темір тұлпар технократтық дәуірдің бөлінбес бөлшегі десек те, ара-тұра жаяу жүру адам денсаулығына да оң ықпал етеді. Сол арқылы қаншама адам ғаламшарымызды бір күндік қауіптен сақтап қалады, – деді Жандар Жамбылұлы.
Айта кету керек, еліміздің бірқатар қалаларында да «Автокөліксіз күн» челленджі өтіп, оған мыңдаған адам қатысты. Жалпы, мұндай акциялар өткізу тәжірибесі мол әлем елдерінде жиі қолдау тауып, тұрақты жүргізіліп тұрады.
Нұрболат АМАНБЕК
Ұқсас жаңалықтар
