![Мектептерде бейнеталдау жүйесін енгізу жоспарлануда](https://aqjolgazet.kz/uploads/resized-images/2024/02/d70ba04c-cd06-459b-8348-951c1cd29cc9.jpeg)
Мектептерде бейнеталдау жүйесін енгізу жоспарлануда
Облыс әкімі Ербол Қарашөкеевтің төрағалығымен өткен жиында Жамбыл облысында 2024-2028 жылдарға арналған азаматтық қоғаммен әріптестікте қоғамдық қауіпсіздікті қамтамасыз ету жөніндегі тұжырымдаманы іске асыру барысы талқыланды. Басқосуда цифрлық технологиялар басқармасының басшысы Руслан Нокрабеков жасанды интеллектті пайдалана отырып, бейнеаналитика жүйесін дамыту бойынша жүргізіліп жатқан жұмыстар жөнінде баяндады.
– Мемлекет басшысы Үкіметтің кеңейтілген отырысында жасанды интеллект технологияларын кеңінен қолдануды қамтамасыз етуді міндеттеді. Бұл жұмыс қоғамдық қауіпсіздікті қамтамасыз ету саласында бірегей шешімдерді ұсынатын компаниялармен бірлесіп жүргізіледі, – деп атап өтті басқарма басшысы.
Сондай-ақ, басқарма басшысы террористік тұрғыдан әлсіз нысандарда қауіпсіздік шараларын күшейту мәселелеріне де тоқталды. Атап өтерлігі, 133 білім беру мекемесінде өрт қауіпсіздігін басқару жүйесін орнату жоспарлануда.
Жиын барысында «Target ai Limited» компаниясының директоры Дамир Жаримбетов пен «Жаңа технологиялар-Тараз» компаниясының өкілі Анастасия Махажанова білім мекемелерінде қауіпсіздік жүйесін орнату бойынша жобаларды таныстырды.
Жалпы, былтыр бейнебақылау жүйелерін орталықтандыру бойынша қанатқақты жоба іске қосылды. Бірыңғай платформаға білім беру және денсаулық сақтау нысандары мен теміржол вокзалының аумағында және қоғамдық орындарда орнатылған бас-аяғы 50 бейнебақылау камерасы қосылған. Өз кезегінде бұл қадам қажетті ақпаратты алу процесін жеңілдету мен жеделдетуге, қоғамдық тәртіпті бұзу фактілеріне жедел әрекет етуге мүмкіндік береді.
Айта кетейік, бейнеталдау жүйесі жеке тұлғаны немесе автокөлікті анықтауға мүмкіндік береді. Бастысы, құрылғы адамдар көп жиналатын орындарда, түтін немесе от анықталған кезде де кедергісіз жұмыс істейді.
Жиын соңында аймақ басшысы жауаптыларға өңірлік полиция департаментімен бірлесіп, аталған жобалардың маңыздылығы мен тиімділігін мұқият зерделеуді тапсырды.
– Оқушылардың қауіпсіздігін қамтамасыз етуде барлық мәселелерді қамтитын және дер кезінде тәуекел аймақтарын анықтайтын кешенді жүйені бекіту қажет, – деді облыс әкімі.
«Aq-jol» Aqparat.
Ұқсас жаңалықтар
Саналы ұрпақ сап түзеген салтанат
- 3 қыркүйек, 2024
Жаңа жетістіктерге жол бастаған күн
- 3 қыркүйек, 2024
Ақпарат
Алматылық қос азаматтың жазасы жеңілдетілді
- 30 тамыз, 2024
Президент эстрада әншісін «Барыс» орденімен марапаттады
- 22 шілде, 2024
Газетке жазылу
«Aulieata-Media» серіктестігі газетке онлайн жазылу тетігін алғаш «Halyk bank» қосымшасына енгізді