Қазақтың қайсар ұлдарының бірі, Екінші дүниежүзілік соғыста асқан ерлігімен ел есінде қалған, Кеңес Одағының батыры Бауыржан Момышұлының туғанына бүгін – 113 жыл. Баһадүр бабаларымыздың жалғасындай болған Бауыржан атамыз ел мен жерге қызмет етудің, отанға қорған болудың қайталанбас үлгісін таныта білді. Оның ғұмыр жолы, азаматтық ұстанымы бүгінгі жас ұрпақ үшін үлгі-өнегеге толы. «Отан үшін отқа түс – күймейсің», «Тәртіпке бас иген – құл болмайды, Тәртіпсіз ел болмайды», «Жерге тер төгіп, халыққа қан төгіп қызмет етуден аянба»,-деген секілді Баукеңнен қалған көптеген нақыл сөздер бүгінде ұранымызға айнала білді.  Бауыржан Момышұлын тек жамбылдықтар ғана емес, барша қазақстандықтар мақтаныш тұтады. Облысымыздағы 7 мектеп, 1 ауылдық округ, 1 елді мекен, 44 көше, 1 саябақ, 1 стадионға батырдың есімі берілген. Қаһарманға деген құрмет ешқашан толастамайды. Батыр бабымыздың ұлағатын ұлықтап, өскелең ұрпақты отансүйгіштік рухта тәрбиелеу – біздің негізгі мерейлі міндеттеріміздің бірі.