Еуразиялық экономикалық одақтың дамуына орай оған қатысушы елдер мен ТМД мемлекеттері үшін зейнетақымен қамтамасыз ету саласындағы саясатты үйлестіру мәселелері өзекті бола түседі, деп жазады «Казахстанская правда» газеті сенбілік санындағы «Пенсионная мобильность» деген тақырыптағы мақаласында.

Қазақстан заңнамасы азаматтардың трансшекаралық ұтқырлық құқығын қамтамасыз етеді. Өйткені, олардың ресми түрде тұрғылықты мекен жайын өзгерткенге дейінгі барлық жинақтары, зейнетақы қаржысы «күйіп» кетпейді, өзімен бірге қалады. Еуразиялық даму банкі мен Дүниежүзілік банк сарапшыларының «Еуразиялық экономикалық одақ және ТМД аясындағы зейнетақы ұтқырлығы» атты зерттеу нәтижесінде дәл осындай қорытынды шығарылған. Зерттеудің Қазақстанға қатысты тармағында еліміздегі «ерікті зейнетақы жинақтары азаматтардың жеке есепшоты ретінде қарастырылатындығы айтылған. Сарапшылар қандай шешім қабылданса да зейнетақының жинақтаушы бөлігіне ерекше назар аудару қажет деп санайды. Яғни, егер азамат жеке зейнетақы қорына ақша аударып отырса не болмаса оның тұрып жатқан елде жинақталған зейнетақысы болса, онда ол басқа мемлекетке қоныс аударған кезінде жинаған барлық қаржысын ала алуы не сол елдегі зейнетақы қорына аудара алуы тиіс.