Қауіпсіздікті қамтамасыз ететін құқық қорғау органдары қызметкерлерінің қай кезеңде де жауынгерлік деңгейі заман талабына сай болуы керек. Бұл ретте құзырлы органдар тәртіп сақшыларының кәсіби қызметтік дайындығын арттыру әрі тактикалық іс-қимылдарын жетілдіру мақсатында түрлі жұмыстар атқарылуда. Жуырда өңірлік Қылмыстық-атқару жүйесі департаментіне бағынысты түзеу мекемелерінің басшы және жеке құрам қызметкерлері Жамбыл ауданындағы Айша бибі полигонында қоян-қолтық күрес, қалқан және резинка таяқшасымен жұмыс істеу секілді шеберліктерін шыңдады. Бұдан бөлек, түрлі табельдік қарудан оқ атып, біліктіліктерін арттырды. Сондай-ақ, түрлі деңгейдегі элементтер арқылы аралас жаттығулар мен сынақ тапсырмаларын орындады. Жалпы, мұндай жаттығулар әрбір қызметкердің жұмыс барысындағы жауапкершілігін артуына зор ықпал ететіні сөзсіз.