2023 жылғы 25 қазанда Жамбыл ауданының 46 жастағы тұрғыны полиция бөліміне мал ұрлығы туралы арызбен жүгінді. Ер адам бір күн бұрын белгісіз адамның қорасынан 6 бас қойын ұрлап кеткенін хабарлады. Келтірілген залал көлемі 300 000 теңгені құрады. Аталған дерекке қатысты ҚР ҚК-нің 188-1-бабының 1-бөлігі (Мал ұрлығы) бойынша сотқа дейінгі тергеу амалдары басталды. Жүргізілген жедел-іздестіру іс-шараларының нәтижесінде полиция қызметкерлері 21 жастағы жергілікті тұрғынды анықтап, ұстады. Күдікті өз кінәсін толық мойындады, тергеу әрекеттері жүргізілуде.  

Жамбыл облысы Полиция департаментінің баспасөз қызметі