Жамбылдық шаруалар алдағы демалыс күндері елордамыз Астана төрінде өтетін ауыл шаруашылығы өнімдерінің кезекті жәрмеңкесіне қатысады. Екі күндік шара барысында жалпы құны 168,6 миллион теңгені құрайтын 298,8 тонна ауыл шаруашылығы тауарлары тұтынушылар назарына ұсынылмақ. Бұл күндері 33 тонна ет өнімдері, 3,2 тонна тауық еті, 4 тонна шұжық өнімдері, 14 тонна сүт өнімдері, 6 мың дана жұмыртқа және 1 тонна кондитерлік өнімдер, 3,4 тонна макарон өнімдері, 10 тонна балық, 5 тонна бал, сондай-ақ, 208 тоннадан астам көкөніс-бақша және жеміс-жидек өнімдері нарық бағасынан 10-15 пайыз төмен бағада саудаланады деп күтілуде. Облыс әкімдігі ауыл шаруашылығы басқармасы басшысының орынбасары Нұрсұлтан Ақжоловтың айтуынша, дәстүрлі жәрмеңкеге өңіріміздегі ауыл шаруашылығы тауар өндіруші кооперативтері мен өз кәсібін ашқан жеке кәсіпкерлер атсалысуда. – Жәрмеңкенің жиі өткізілуі бағаны тұрақтандыруға айтарлықтай ықпал ететіні анық. Өйткені, қазір халық жәрмеңкенің тиімді екенін түсінді. Астана қаласындағы дәстүрлі жәрмеңкеге елі дархан, жері құт, киелі мекен Жамбыл жерінен үш жүз тоннаға жуық ауылшаруашылығы тауарлары жөнелтілмек. Қазіргі таңда барлық тауарлар жүк көліктеріне тиеліп жатыр. Айта кетейік, бұл жәрмеңкеге Тараз қаласы мен Байзақ, Жамбыл, Жуа лы, Меркі, Мойынқұм, Қордай, Сарысу, Т.Рысқұлов, Талас және Шу аудандарының, «Ауыл аманаты» жобасы аясында құрылған ауыл шаруашылығы тауар өндіруші кооперативтері мен өз кәсібін ашқан жеке кәсіпкерлер белсене қатысуда. Бұған дейінгі жәрмеңке барысында қарапайым халық ауылшаруашылығы өнімдерін көптеп сатып алып, өз ризашылықтарын білдіргені бар. Бұл жолы да біздің диқандар өз өнімдерін делдалсыз саудалауға мүмкіндік алып отыр, – деді Нұрсұлтан Алтайұлы. Ал, т араздық «Көкжиек» серіктестігінің сатушысы Нұрбала Жақыпова өңірлерден келетін өнімдер өз бағасында өткерілетіндіктен, көпшілік кез келген тауарды мол қылып алуға тырысатынын жеткізді. Ол өз сөзінде бұл жолғы жәрмеңкеде сүттің әрбір литрін 300 теңгеден саудалауды көздеп отырғанын да жасырмады. Айтуынша, былтыр бұл өнімдер 270 теңгеден өткеріліпті.  

Есен ӨТЕУЛІ