Бүгін ел Президенті Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауын жариялады. Мемлекет басшысы өз сөзінде жыл сайын халыққа арнаған Жолдауын Парламент сессиясының ашылуында жариялайтынын айтып, бүгінде бұл жақсы дәстүрге айналғанын атап өтті.

- Мұның айрықша мәні бар. Себебі дәл осы сәтте және дәл осы жерде билік тармақтарының барлық өкілдері бас қосады. Алдағы орта мерзімдік жұмыстың бағыт-бағдары айқындалады. Нақты тапсырмалар беріледі, жаңа міндеттер жүктеледі. Парламент, Үкімет және басқа да құзырлы органдар тың қарқынмен іске кіріседі. Бір сөзбен айтсақ, мемлекеттік аппараттың үйлесімді әрі тиімді жұмыс істеуі үшін бұл іс-шара өте маңызды. Бүгінде менің бастамаларымның басым көпшілігі жүзеге асты. Бірқатар жұмыс жалғасып жатыр. Осы орайда халықтың тұрмыс сапасына тікелей әсер еткен кейбір шараларды атап өткім келеді. Мысалы, 2020 жылдан бері мұғалімдердің жалақысы екі есе өсті. Дәрігерлердің айлығы да айтарлықтай көбейді. Қазір олардың табысы еліміздегі орташа жалақыдан әлдеқайда жоғары. Жұртқа зейнетақы жинағының бір бөлігін пайдалану мүмкіндігі берілді. Миллионға жуық адам осы жобаның игілігін көрді – тұрғын үй мәселесін шешіп, баспаналы болды. «Жайлы мектеп» жобасы аясында 400-ге жуық мектеп салынады. Қазір ауылдық жерде 300-ден астам денсаулық сақтау нысаны салынып жатыр. «Ұлттық қор – балаларға» жобасы қолға алынды. Соның арқасында жаңа жылдан бастап балалардың есепшотына қаражат түсе бастайды. Игерілмей жатқан немесе заңсыз берілген 8 миллион гектар жер мемлекет меншігіне қайтарылды. Мен нақты іске асқан шаралардың бір бөлігін ғана атап өттім. Шын мәнінде, көп жұмыс атқарылды, болашақта да өз жалғасын табады. Өздеріңізге мәлім, былтырдан бері елімізде ауқымды саяси жаңғыру жұмыстары жүргізілді. Небәрі бір жарым жылдың ішінде көптеген өзгеріс жасалды. Оған баршаңыз куә болдыңыздар, реформаны жүзеге асыру үшін белсенді түрде жұмыс істедіңіздер, - деді Президент. Мемлекетті басшысы жариялаған бас құжатты өңірлік Қылмыстық-атқару жүйесі департаментіне бағынысты №26 түзеу мекемесінің басшы және жеке құрам қызметкерлері де ерекше ықыласпен тыңдады. Тәртіп сақшылары Президенттің әрбір бастамасы егемен елімізді өркендетуге бастайтынын жеткізді. Құқық қорғау қызметкерлері кез келген қылмыстың өтеуі жаза екенін алға тартып, Қасым-Жомарт Кемелұлы айтқандай, даладағы, көшедегі вандализм, кейбір азаматтарымыздың тәртіпсіздігі, мәдениетсіздігі, неше түрлі тұрмыстық жанжалдар еліміздің халықаралық аренадағы абыройына нұқсан келтіреді дейді. - Қай уақытта да Президент Жолдауының маңызы зор. Себебі, тәуелсіз еліміздің тұғыры биік болуы үшін барлық қажетті шараларды қамтитын құжатта ел болашағын бағдарлап аламыз. Жалпы, заңды сақтау, қоғамдық тәртіпті қамтамасыз ету – баршаның міндеті. Біз, құқық қорғау органдарының өкілдері бұл тұрғыда бар күш-жігерімізді жұмсап, антымызға адалдық танытарымыз хақ. Мемлекетіміздің қазіргі даму үлгісін түбегейлі өзгерту мақсатында жұмыла жұмыс істеуіміз қажет-ақ. Сонда ғана Президент айтқандай, көздеген мақсатымызға жету жолында кездескен кедергілердің бәрін жеңеміз, - дейді мекеме бастығының міндетін атқарушы, әділет подполковнигі Бағдат Байтуреев. Айта кетейік, Президент Жолдауында еліміздің туристік әлеуеті басқа мемлекеттермен салыстырғанда артта қалып келетіні жөнінде кеңінен айтылды. Басты құжатта жұмысқа өзіміздің шикізатты, тауарлар мен кадрларды, барлық ішкі мүмкіндіктерімізді пайдалану сөз болды. Сондай-ақ, Семей полигоны халқымызға қаншама қасірет әкелгені ескеріліп, Қазақстанда Су ресурстары және ирригация министрлігі құрылатыны мәлімделді. Бұдан бөлек, Мемлекет басшысы кемінде үш белгілі ЖОО жасанды интеллект саласына қажетті кадр даярлаумен және зерттеулер жүргізуімен айналысуы керектігі атап өтіліп, аудан әкімдеріне жергілікті бюджетті басқару құқығын беру жөн болатынына тоқталды.