- Advertisement -

Дарынды оқушылар – еліміздің жарқын болашағы

54

- Advertisement -

Биылғы оқу жылында жамбылдық дарынды оқушылар халықаралық, республикалық олимпиадалар мен ғылыми жарыстарда 252 медаль иеленген. Оның ішінде 30 медальді халықаралық білім жарыстарында жеңіп алған.

«Баласағұн» орталық концерт залында облыс әкімі Нұржан Нұржігітов дарынды оқушылармен кездесіп, жоғарыда аталған сандарды ерекше мақтанышпен жеткізді. Кездесуге қатысқан 100 дарынды оқушы мен бірқатар ұстаздар қауымымен еркін форматта әңгіме-дүкен құрды.

Облыс әкімі алдымен концерт зал фойесінде халықаралық, республикалық ғылыми жоба жеңімпаздарының көрмесімен танысып, жақсы бағасын берді. Көрмеге оқушылардың өздері немесе жетекшілерімен бірге әзірлеген түрлі жобалары қойылды.

Кездесуде Нұржан Нұржігітов кезекті оқу жылын жамбылдық оқушылар табысты аяқтағанын атап өтіп, әсіресе, дарынды оқушылардың жетістіктері облыстың мерейін асырғанын жеткізді.

– Сіздер оқушылар арасында түрлі деңгейдегі олимпиадалар мен жарыстарда облыстың мерейін асырып жүрсіздер. Бұл жеңіс – сіздердің терең білімдеріңіз бен ізденістеріңіздің жемісі! Осы жетістіктеріңіз үлкен өмірдегі табыстарыңыздың бастауы деп білемін. Біз – сіздермен мақтанамыз! Елімізде, оның ішінде біздің облыста да оқушылардың сапалы білім алуына баса мән беріліп, дарынды оқушыларға үлкен қолдау көрсетіліп келеді. Еліміздің барлық өңірі секілді облысымызда да қазіргі заман талаптарына сай жабдықталған жаңа үлгідегі мектептер салынуда. Соған сәйкес, жыл өткен сайын білімді жастардың қатары көбеюде, – дей келе, облыс әкімі бірқатар жетістіктерге тоқталды.

Атап айтсақ, республикалық пән олимпиадасы мен ғылыми жоба жарысында облыс командасы 14-ші жыл қатарынан жүлделі бірінші орынды иеленсе, қоғамдық-гуманитарлық бағыттағы пәндер бойынша облысымыздың командасы «Ең үздік олимпиадалық команда» болып танылып, жүлделі бірінші орынды жеңіп алған.

Ал, 4-сынып оқушыларының оқу сауаттылығын айқындайтын PIRLS халықаралық зерттеуінің нәтижесі бойынша облысымыздың оқушылары республика бойынша екінші орынды иеленген.

Мектеп бітіруші түлектердің жыл сайын жоғары оқу орындарында білім алуы үшін жергілікті бюджеттен мемлекеттік білім беру грантына қаржы бөлінуде. Мәселен, биыл 10 педагогикалық, 15 су шаруашылығы, 25 химия, 5 мәдениет саласындағы мамандықтарға барлығы 55 орын беріліпті.

Сондай-ақ, биыл М.Х.Дулати атындағы Тараз өңірлік университеті мен Д.Менделеев атындағы Ресей химия-технологиялық университеті және «Қазфосфат» жауапкершілігі шектеулі серіктестігі арасында үш жақты меморандум жасалды. Осы құжат шеңберінде өңірімізге қажетті инженерлік химия мамандарын даярлау үшін биыл жоғарыда атап өткен 25 білім беру гранты бөлінуде. Бұл мамандық бойынша бітірген түлектер болашақта қос университеттің де дипломдарын алып, өндірісте қызмет ете алады.

Кездесу барысында облыс әкімі Нұржан Нұржігітов дарынды жастарға ризашылығын білдіріп, сертификат сыйлады. Ал, жеңімпаз оқушыларды дайындаған 15 мұғалім Құрмет грамоталарымен марапатталды.

Сондай-ақ, Тараз қаласындағы дарынды ер балаларға арналған мамандандырылған «Білім-Инновация» лицей-интернатының 9-сынып оқушысы Шарел Марғұлан өзінің орамды ойын ортаға салып, жан-жақты қолдауы үшін облыс басшылығы мен ұстаздар қауымына ризашылығын жеткізді.

 

Сұлтан НҰРТАЙ,

М.Х.Дулати атындағы Тараз өңірлік университетінің 3-курс студенті.

Comments are closed.

Page Reader Press Enter to Read Page Content Out Loud Press Enter to Pause or Restart Reading Page Content Out Loud Press Enter to Stop Reading Page Content Out Loud Screen Reader Support