Мұражайдың жастарды отансүйгіштікке, ерлікке, адамгершілік пен мейірімге, сонымен бірге ел тарихын тануға тәрбиелейтіні белгілі. Осыған орай, аудандық пробация қызметінің есебінде тұрған қоғамнан оқшаулауға байланысты емес жаза түрі тағайындалған азаматтардың рухани байлығын арттырып, мәдени көзқарасын қалыптастыру мақсатында аудандық тарихи-өлкетану музейінде арнайы іс-шара ұйымдастырылды. Оған Байзақ аудандық пробация қызметі бөлімінің бастығы, әділет капитаны Тимур Молдатаев бастаған аудандық пробация қызметінің есебінде тұрған қоғамнан оқшаулауға байланысты емес жаза түріне сотталғандар қатысты. Оларға тарихы ғасырлар тереңінен сыр шертетін, ауданның кешегісі мен бүгінгісін айшықтайтын «Археология», «Даңқ», «Аудан тарихы», «Этнография», «Мәдениет және спорт» бөлімдеріне қойылған құнды жәдігерлер таныстырылды. Сонымен қатар, Сарыкемер ауылындағы «Батырлар аллеясында» ауданнан шыққан 27 Социалистік Еңбек Ерінің және Кеңес Одағының Батыры Ақәділ Суханбаевтың, бейбіт күнде ерлік жасаған «Халық қаһарманы» Ғазиз Байтасовтың, Мәскеу Олимпиадасының чемпионы, Қазақстанның Еңбек Ері Жақсылық Үшкемпіровтің өмір жолдарынан мағлұмат берілді. Пробациялық бақылау белгіленген азаматтар бұл іс-шарадан жақсы әсер алып, рухани тұрғыдан бір байып, құнды ақпараттармен танысқанын айтты.  

Айнагүл МАМЫТБЕКОВА,

аудандық тарихи-өлкетану музейінің ғылыми қызметкері.

Байзақ ауданы