Жамбыл облысының әкімі Нұржан Нұржігітов Тараз қаласында салынып жатқан 200 орындық облыстық көпсалалы онкологиялық және хирургиялық орталықтың құрылыс барысымен танысты. Қазіргі таңда бас мердігер «Тур-Ахмет и Компания» ЖШС құрылыс-монтаж жұмыстарын аяқтап, технологиялық жабдықтарды іске қосу шараларын жүргізуде. Орталық КТ, магнитті-резонанстық томография, цифрлық маммография, рентген аппараты, эндоскопиялық құрал, ультрадыбыстық аппарат секілді заманауи жабдықтармен қамтылуда. Орнатылған желілік үдеткіштің көмегімен онкологиялық науқастар үшін сәулелік терапияның жоғары тиімді әдістері енгізілетін болады. Сондай-ақ, кеуде және жалпы хирургия, радиология, сәулелік гимнастика, гематология, гинекология, химиотерапия, реанимация және тағы да басқа бөлімдері бар. Облыс әкімі емдеу кабинеттерін аралап, медициналық құрал-жабдықтарды көріп, дәрігерлермен әңгімелесті.

- Мемлекет басшысы денсаулық сақтау саласындағы көрсеткіштерді жақсарту және өмір сүру сапасын арттыру, мүгедектік пен өлім-жітімді төмендетуге қол жеткізу бойынша міндеттер қойып отыр. Осы орайда онкология және хирургия орталығының құрылысы –   өте маңызды жоба. Мердігерлерге мұндай ірі нысанның құрылысын кешіктірмеу, уақытылы аяқтау тапсырылған болатын. Дегенмен, жұмыс кестесі бұзылып отыр. Мердігерлердің бірі МРТ аппаратын іске қосуды кейінге қалдырған. Соңғы мерзім – 2 мамырға дейін уақыт беріліп отыр. Егер компаниялар өз міндеттемелерін орындамаса, келісімшарттарды бұзу керек, - деді Нұржан Нұржігітов.

Аймақ басшысы аурухана базасында мердігер ұйым өкілдерімен кеңес өткізді. Нұржан Нұржігітов мердігерлерді құрылыс жұмыстарының мерзімін сақтамағанын сынға алып, бұзушылықтарды жою және медициналық құрал-жабдықтарды орнатуға қатысты мәселелерді жедел шешуге қатысты міндеттер жүктеді.  

Жамбыл облысы әкімдігінің баспасөз қызметі