«Яндекс. Доставка» қызметі «Азаматтарға арналған үкімет» мемлекеттік корпорациясының дайын құжаттарды халыққа қызмет көрсету орталығынан клиенттердің мекенжайына дейін экспресс жеткізу сервисі бойынша серіктесі болды. Дайын құжатты алу үшін ХҚКО-ға бармай-ақ, жеткізіп беруге тапсырыс беруге болады. Енді халыққа қызмет көрсету процестері бұрынғыдан да жақсарды, дайын құжатты алу үшін ХҚКО-ға қайта келудің қажеті жоқ. Бұған дейін Мемлекеттік корпорация бір жұмыс күні ішінде құжаттарды жеткізу сервисін жүзеге асырған болатын. Енді «Яндекс. Доставкамен» бірлесіп, жеткізудің неғұрлым жылдам әрі ыңғайлы, баламалы тәсілі іске қосылды. «Дереу арада құжаттардың қажет болып қалатын жағдайлары жиі болады, сондайда «Яндекс. Доставка» жеткізілімін пайдалану ыңғайлы. Әрбір азаматта жұмыстан сұрануға немесе балаларын үйде жалғыз қалдыруға мүмкіндік бола бермейді. Осындайда құжаттарды жеткізу сервисі уақыт пен қаражатты айтарлықтай үнемдейді», – деп атап өтті Мемлекеттік корпорацияның Басқарма төрағасы Сүйеніш Әбділдин. Мысалы, егер ХҚКО-ға дейінгі қашықтық 3 километр болса, онда «Яндекс» құжатты шамамен 1 500-2 000 теңгеге әкеледі. Жеткізу уақыты – 15 минуттан 2 сағатқа дейін. Бұл уақыт көрсетілген мекенжайға байланысты, ал құны көрсетілген мекенжайдың орналасқан жеріне, жолдағы кептелістерге, жол жүктемесіне байланысты әртүрлі болуы мүмкін. «Яндекс доставка» еліміздің 17 қаласында бар, жақын арада бұл сервис басқа қалаларда да қолжетімді болады. Жеткізуді рәсімдеу процесі барлық клиентке қолжетімді. Клиентке express.gov4c.kz порталы арқылы дайын құжаттарды жеткізуді рәсімдеу ұсынысымен «1414»-тен SMS-хабарлама келіп түседі. Өтінімді рәсімдеу кезінде клиент сауалнамалық деректерді толтырып, жеткізу мекенжайы мен телефонын көрсетуі қажет. Содан кейін құжаттарды жеткізу үшін төлем жасауы тиіс. Нақты уақыт режимінде курьердің жол қозғалысын қадағалап, онымен «Яндекс GO» мобильді қосымшасы арқылы хабарласуға болады. Қосымша жоқ болған жағдайда, жеткізілімді SMS-те келген сілтеме арқылы карта виджетімен бақылауға болады. Сондай-ақ дайын құжаттарды жеткізу 150 мемлекеттік қызмет бойынша қолжетімді, олардың ішінде жылжымайтын мүлікке құқықтарды (ауыртпалықтарды) мемлекеттік тіркеу жөніндегі құжаттар, жер учаскелеріне актілер, апостильденген білім туралы құжаттар, мұрағаттық анықтамалар, әскери билеттердің телнұсқалары және басқалар бар. Бұл ретте жеткізу сервисіне жеке куәлік, паспорт және жүргізуші куәлігі сияқты құжаттар кірмейді.  

 Шалқар ЕЛЕМЕС,

халыққа қызмет көрсету бойынша Тараз қалалық

№1 бөлімінің басшысы.