ШЫҰ миссиясы 20 қараша күні өтетін кезектен тыс президент сайлауын қадағалайды. Оның дерегінше, мисссия құрамында ШЫҰ-ға мүше мемлекеттердің заң шығарушылық, атқарушылық және сайлау органдарының өкілдері, ШЫҰ хатшылығының лауазымды тұлғалары бар. «Байқаушылар миссиясының мүшелері қызметін саяси шынайылық, бейтараптылық және ішкі іске араласпау ұстанымдарын басшылыққа ала отырып, дербес әрі тәуелсіз жүргізеді. Миссиямызды әділ әрі адал атқаратын боламыз. Қазақстан халқын жарқын болашақ күтіп тұр деп есептейміз. Осыған орай Қазақстанның әділ, тиімді саяси процестерін қамтамасыз ету үшін бізге байланысты жайттың бәрін жасаймыз. Алдағы күндері миссия мүшелері Астана қаласы мен Ақмола облыстарындағы сайлау учаскелерін аралайтын болады», — деді миссия басшысы.