Облыс журналистикасының ардагері, Қазақстанның еңбек сіңірген мәдениет қызметкері, Жамбыл облысының Құрметті азаматы Баттал Жаңабайұлын өңіріміздің әр адамы біледі, құрметтейді. Журналистиканың майталманы бұл құрметке лайық.

Оның жүріп өткен үлгілі жолын оқырман есіне тағы бір салсақ артығы болмас. Ол 1950 жылы Қазақ ұлттық университетін журналистика мамандығы бойынша бітіріп, журналистикаға араласты. Әуелі бұрынғы Семей облыстық «Екпінді» газеті редакциясында тілші, бөлім меңгерушісі, жауапты хатшының орынбасары, жауапты хатшы секілді қызмет сатыларынан өтті. Ал 1957 жылы өзі туып-өскен облысқа оралып, облыстық «Сталиндік жол» газеті (қазіргі «Aq jol») редакциясында бөлім меңгерушісі болды. 1962-1965 жылдары облыстық партия комитетінің бөлім меңгерушісі, облыстық партия комитеті идеология жөніндегі хатшысының орынбасары қызметтерін абыройлы атқарды. Асанбай Асқаровтың өнегелі мектебінен өткені де сол жылдар. 1965-1985 жылдары облыстық «Еңбек туы» (қазіргі «Aq jol») газетінің бас редакторы қызметін атқара жүріп, үлкен абыройға бөленді. Бәкең қазақ және орыс редакцияларын жеке-жеке бөлуге, облыстық газеттің қазақтілді болып, берік қалыптасуына зор еңбек сіңірді. Редакторлыққа тағайындаларда сол кездегі Қазақстан Компартиясы орталық омитетінің сол кездегі бірінші хатшысы Дінмұхамед Қонаевтың қабылдауында болады.

Ол кісі «Қарағым, редакторлық деген өте жауапты жұмыс. Жауапты қызметті үлкен жауапкершілікпен атқар. Тілектеспін» деп, қолдау білдіріп, сенім артқан екен. Жиырма жылдан астам уақыт бас редактор болған Баттал аға үлкен кісінің сол сенімін ақтады. Б.Жаңабайұлы басқарған жылдары газет «Еңбек Қызыл Ту» орденімен марапатталды. Ал өзі де лайықты марапаттардан шет қалмады. Баттал Жаңабайұлы екі рет «Құрмет белгісі» орденінің иегері атанды. «Ақ жол» газетінің 50 және 60 жылдық мерейтойларын жоғары деңгейде атап өтуге бас редактор ретінде үлкен күш-жігерін жұмсады. 1985-1989 жылдары кино жөніндегі облыстық кеңесінің төрағасы қызметін де жоғары деңгейде атқарып, Құрметті еңбек демалысына шықты. Онда да еңбектен қол үзбей, 1989-1991 жылдары Бейбітшілік пен татулық қорының облыстық бөлімшесінің төрағасы қызметін атқарды. 1996 жылдан ұзақ жылдар бойы Д.А.Қонаев қорының облыстық филиалына жетекшілік етті. Баттал Жаңабайұлы зейнетке шыққаннан кейін үш кітап жазып шықты. Бұл еңбектердің барлығы – ойлы, құнарлы, мазмұнды дүниелер. «Ғұмыр бір күндей ғана», «Сөз – құдірет» кітаптары баршаға ой салады. «AULIEATA MEDIA» ЖШС бас директоры Оралхан Дәуіт пен осы ЖШС-ға қарасты облыстық «Aq jol» газетінің бас редакторы Хамит Есаман аталған басылымның 100 жылдық мерейтойы қарсаңында Баттал Жаңабайұлының құтты шаңырағына арнайы барып, газеттің мерекесімен құттықтап, шапан жауып, құрмет көрсетті. Оралхан Дәуіт «Aq jol» газетінің 100 жылдығына орай шыққан мерекелік медальдің алғашқысын Баттал қарияның өңіріне тақты.

Жаңадан жарық көрген «Ғасыр шежіресі» атты кітапты сыйға тартып, ізгі тілектерін арнады. Олар ардагердің жары Фарида Алтайбаеваға да құрмет көрсетті. Қазіргі таңда Баттал Жаңабайұлы 95 жасқа қарай аяқ басса, Фарида апай 92 жаста екен. Мұнан соң Баттал Жаңабайұлы құттықтап келген азаматтарға алғысын білдіре келе: «Мен «Aq jol» газетінің 50 жылдығын осылай ұйымдастырдым. Содан бері де жарты ғасыр өте шыққан екен. Ол кезде газеттің жарық көруі оңай болған жоқ. Әріпті қорғасынмен тереді. Ол ағып кетіп, мамандарды әуреге салады. Бір жұмыс, екі жұмыс болатын. Газеттің түнімен теріліп бітпей, таңертеңгі сағат 10-да шыққан кезі де болды. Сонда да газет қызметкерлері мойыған жоқ. Сол ұлағатты із жалғасып, өңірдің бас газеті ғасыр жасқа да жетті. Құтты болсын! Өздеріңнің істеріңе табыс тілеймін», деді.

Ал Фарида апай «Түн ішінде балалар шырт ұйқыда жатқанда есік тарсылдап, шығып жатқан газеттің макеттері келеді. Оны Бәкең коридорға қатар- қатар жайып қойып көретін. Көзінің нашар көруі сол газетті талмай оқығаннан болды. Осы шаңырағымызға Әзілхан Нұршайықов бастаған жақсы-жайсаңның бәрі келді», деп өз пікірін қосып қойды. Соңында Баттал аға бата берді. Ал біз жұптарын жазбай тоқсаннан асқан ерлі-зайыпты кісілерге бақытты, ұзақ ғұмыр тіледік.  

 Есет ДОСАЛЫ