Пентагонның ресми өкілі адмирал Джон Кирби Құрама Штаттардың “Ислам мемлекеті” лаңкестік ұйымына қарсы әуеден соққы бере бастағанын айтып хабар таратты. Оның айтуынша, Сирияда аталған террористік ұйым орналасқан жерлерге шабуыл жасау қолға алынған. Бұған дейін АҚШ президенті Барак Обама да «Ислам мемлекетіне» қарсы күресті күшейтетінін мәлімдеген еді. Ал Ресей жағы үзілді-кесілді қарсы. Владимир Путин Сирия үкіметінің рұқсатынсыз АҚШ-тың шабуылдауы қисынсыз деген ұстанымда. Айта өтейік, «Ислам мемлекеті» ұйымының Сирия мен Ирак аумағындағы ондаған мұнай кен орындарын өз бақылауында ұстап отырғаны да белгілі болды.