Облыстық жедел медициналық жәрдем стансасының диспетчерлік қызметі «Көмек» автоматтандырылған басқару жүйесімен жабдықталып, санитарлық автокөліктердің GPS-навигациясымен біріктірілген. Бұл науқасқа жету уақытын барынша қысқартып, қозғалыс бағытын автоматты түрде таңдауға мүмкіндік береді. Аталған жүйе шаһардың емханаларымен біріктірілген. Жедел медициналық көмек стансасының Call-орталығында «103» нөмірі бойынша 12 телефон қызмет көрсетеді. Өңірдегі мұндай шақыртулардың барлығы облыстық медициналық жедел жәрдем стансасының бас ғимаратында орналасқан Call-орталыққа түседі. Бұл туралы аталмыш мекеменің бас дәрігері Венера Балқыбекова өңірлік коммуникациялар қызметі ақпарат алаңында өткен баспасөз мәслихатында баян етті. – Биыл Жол картасы бойынша «Kazmedconsult» оқу-клиникалық орталығының бастамасымен 124 диспетчер «Қоңырауды ұстап қалу жүйесін енгізу» бойынша өз біліктіліктерін жоғарылатты. Тоқсан сайын диспетчерлер аттестациядан өтіп тұрады. Call-орталығының екі маманы Нұр-Сұлтан қаласына тренер-диспетчер оқуына жіберілді, – деді спикер. «Қазақстан Республикасында жедел медициналық көмек көрсету ережесі» бұйрығына сәйкес халықтың барлық шақырулары оңтайландырылған. Сөйтіп симптомдары (синдромдары) бойынша топтастырылып, шұғылдығы бойынша 4 санатқа бөлініпті. – Қайта ұйымдастыру енгізілгеннен бастап жедел медициналық бригадаларға жүктеме азайды. Төртінші санатты шақыртуларды бастапқы медициналық-санитариялық көмек жанындағы жылжымалы медицина кешендері бригадалары орындайды. Өткен жылмен салыстырғанда бұл санаттағы шұғыл шақырулар 67401-ден 116482-ге артты. Жедел медициналық көмек үшін шұғылдықтың бірінші және екінші санаты маңызды. Ол санаттарда алғашқы 10-15 минут өмірге қауіп төндіретін уақыт. Сол кездегі медициналық көмек госпитальға дейінгі өлім-жітімді 0,37 пайыздан 0,35 пайызға дейін төмендете алады, – деген Венера Заттыбекқызы көлік мәселесіне де тоқталды. Мысалға биыл облыстағы санитарлық автокөлік саны 138 болса, оның 61-інің, яғни 44,2 пайызының тозығы жеткен.

Альмира ОМАРОВА