Құрамында португалиялық атақты шабуылшы Криштиану Роналду ойнайтын Туриннің "Ювентусы" 1/4 финалда Чемпиондар лигасымен қош айтысты, деп хабарлайды Zakon.kz. "Юве" екі ойын қорытындысы бойынша Голландияның "Аяксына" жол берді (1:1; 1;2). Жарысты ары қарай "Аякс" жалғастырады Осылайша Роналду соңғы тоғыз жылдан бері тұңғыш рет Чемпиондар лигасының жартылай финалында ойнамайтын болды. "Реал" сапында Роналду Чемпиондар лигасының кубогын төрт рет төбесіне көтерген ( 2014, 2016, 2017 және 2018 жылдары). Бұл "Аякстың" биыл 1/8 финалда Чемпиондар лигасынан "Реалды" да "қағып" тастағанын (1:2; 4:1) айта кету керек. "Аякспен" бірге жартылай финалға "Барселона" шықты. Олар 1/4 финалда "Манчестер Юнайтедті" екі рет тұқыртты (1:0; 3:0). Бүгін түнде Португалияның "Портуы" "Ливерпульді" қабылдайды (алғашқы кездесуде 0:2 есебімен "Ливерпуль" ұтқан), ал "Манчестер Сити" өз алаңында "Тоттенхэммен" тартысады (0:1). Чемпиондар лигасының финалы 1 маусымда Мадридтегі "Метрополитано" стадионында өтеді.

zakon.kz