Қазақстандықтар бүгін Халықаралық әйелдер күнін мерекелеп жатыр
Бүгін қазақстандықтар жылдағы үрдіс бойынша Халықаралық әйелдер күнін атап өтеді
Кез келген мейрам секілді әйелдер мерекесінің де өзіндік тарихы бар. Осыдан 109 жыл бұрын Копенгагенде жұмысшы әйелдердің қатысуымен II халықаралық конференция өтіп, социал-демократ партиясының тізгінін ұстаған әйелдер тобының жетекшісі Клара Цеткин 8 наурызды - халықаралық әйелдер күні деп белгілеу керектігін ұсынады. Бұл ұсыныс бірден қолдау тауып, 1911 жылдан бастап, Еуропаның бірнеше елінде 8 наурыз мереке ретінде тойлана бастайды. Ал 1975 жылы 8 наурыз - халықаралық әйелдер күні болып жарияланғаннан кейін мереке біршама елдерге қанат жаяды.
Халықаралық әйелдер күнін - Қазақстан және ТМД елдерінде аталып өтіледі. Сонымен қатар, тағы да да тоғыз мемлекетте тойланады. Лаоста бұл - тек әйелдер үшін демалыс күні болса, Қытайда әйелдер үшін жұмыс күні қысқартылған.
Қазақстан Республикасында да бұл мерекеге аса мән беріліп, осы күні елорда мен барлық облыстарда мерекелік шаралар ұйымдастырылады. Елбасы Нұрсұлтан Назарбаев Қазақстанның әйелдер қауымы өкілдерін жыл сайын құттықтайтынын айта кету керек. Күні кеше де Мемлекет басшысы жылдағы үрдіспен нәзік жандарды құттықтаған болатын.
«Ананың құдіреті шексіз. «Оның алдында бүкіл дүние бас иеді» деп тегін айтылмаса керек. Ерте заманда жауласқан жұрттың ортасына ана ақ жаулығын тастаған кезде соғыс тоқталып, бітімге келетін болғанын білеміз. Дәстүрімізді барынша сақтап келе жатқан біз әйел затын әсіресе қадірлейтін xалықпыз. Қазақ ұлты қыз баланы әр уақытта алақанына салып, аялап отыратын. Бұл салтымыз отбасы үшін бұзылмас заңдылыққа айналып келеді. «Ана» деген қастерлі сөзді естігенде тебіренбейтін жүрек жоқ, толқымайтын көңіл болмайды», - деп атап көрсетті Н.Назарбаев.
Мерейлі мерекеге орай «ҚазАқпарат» Халықаралық ақпарат агенттігінің ұжымы барша қазақстандық нәзік жандарды әйелдер күнімен құттықтай отырып, өмірде табыс, еңберіне жеміс тілейді.
Дереккөз; kazinform.kz
Ұқсас жаңалықтар
