Орталық коммуникациялар қызметінде өткен брифингте Денсаулық сақтау министрі Салидат Қайырбекова соңғы үш жылда мемлекеттік тіркеу рәсімінен өткен кезде дәрілік заттардың 1 450 позициясын тіркеуден бас тартылғанын, яғни, осыншама дәрілік заттардың сапасы, қауіпсіздігі және тиімділігі расталмағанын мәлімдеді. 

Оның айтуынша, бұл елімізде тіркелген дәрілік заттардың жалпы көлемінің бестен бірін құрайды екен. Олардың 97 партиясы (бұл 1 миллион 300 мыңнан асатын қаптама) шамамен 11 мың килограмдық субстанциялар (қазақстандық фармацевтикалық нарықтың жалпы көлемінің 0,3 пайызын құрайды) қауіпсіздік пен сапаны бағалау жосығынан өтпепті. Деректерге сүйенсек, соңғы 10 жыл ішінде Денсаулық сақтау министрлігіне түскен арыз-шағымдар бойынша белгілі халықаралық брендтердің белгісімен, яғни нақты 40 атаумен жалған медициналық өнімді өткізудің 90-нан артық фактісі анықталған. «Біз Еуропалық Қауымдастықтың тәжірибесін ескере отырып, министрлік Қылмыстық кодекске жалған медициналық өнімді таратқаны үшін қылмыстық жауапкершілікті енгізу бойынша ұсыныстар бердік. Оған жақында Мемлекет басшысы қол қойды. Сонымен қатар, біз халықтың денсаулығына қауіп төндіретін жалған медициналық өнім және ұқсас қылмыстар жөніндегі қылмыстық жауапкершілікті белгілейтін алғашқы халықаралық-құқықтық құрал болып табылатын Еуропалық Кеңес Конвенциясына қосылуға дайындық үстіндеміз», – дейді С. Қайырбекова.

Ардақ Үсейінова, «Ақ жол».