Облыстық дене шынықтыру және спорт басқармасы соңғы онкүндікте толайым табысқа жеткен жас спортшылар мен олардың жаттықтырушыларын марапаттау рәсімін өткізді. Самбо күресінен Ташкент қаласында өткен Азия чемпионатында өңіріміздің құрама командасы 4 алтын, 2 күміс, 1 қола медальдарды иеленіп келсе, Тараз қаласында өткізіліп, күні кеше мәресіне жеткен республикалық VІІ жазғы спартакиадада облысымыздың өрендері командалық есепте І орынды жеңіп алған болатын. Ал, спортшы Нышан Өмірәлі Ресей Федерациясы, Мәскеу қаласында мүмкіндігі шектеулі спортшылар арасында өткен пара-таэквондодан Әлем чемпионы атанды.

– Соңғы кездері, әсіресе, самбодан үлкен жетістіктерге жете бастадық. Спорттың бұл түрін меңгерген спортшыларымыз әлі де талай биікті бағындырады деп сенеміз. Ал, жақында ғана қаламызда өткізілген бокстан 1997-1998 жылы туылған мектеп пен колледж оқушылары арасындағы VІІ жазғы спартакиадада оқушыларымыз үздік өнер көрсетті. Қанжығамыз 9 бірдей алтынмен, 3 күміспен, 8 қоламен майланды. Тұңғыш рет арамыздан пара-таэквондодан әлем чемпионы шығып отыр. Осы жетістігіміздің барлығы олардың үлкен жігерімен, Отанға, ұлтқа деген үлкен сүйіспеншілігінің де жемісі. Әрі оларға бағыт-бағдар берген жаттықтырушылардың да еңбегі ерен, – деген дене шынықтыру және спорт басқармасының басшысы Гамлет Қайнарбеков жарыстарда жеңімпаз атанған спортшылар мен олардың жаттықтырушыларын облысымыздың спорт саласын дамытуға қосқан үлестері үшін арнайы дипломдармен марапаттады. Сондай-ақ, жаттықтырушы Досберген Тамбиев те өз кезегінде басқарма басшылығына алғысын білдіріп, мұндай жылы қабылдаулардың жастарға үлкен демеу, күш-қуат беретінін жеткізді.

Гүлжан РАХМАН, «Ақ жол».