Футболдан Қазақстан бірінші лигасының төртінші туры аясында «Тараз» футбол клубы «Екібастұз» командасын қабылдады. Бұл ойын жанкүйерлерге керемет көңіл-күй сыйлады. Кездесу барысында командалар 6 гол соқты. «Тараз» футболшылары үшін бұл ойында үш ұпай алу аса маңызды еді. Сол себепті жерлестеріміз ә дегеннен басымдықты қолға алуға тырысты. Әйткенмен «Екібастұз» футболшылары да жеңісті қолдан бере салатын ұжым емес екендіктерін аңғартып, ойынның 27-минутында есеп ашты. Гейсар Алекперадзе мергендігімен көзге түсіп, командасын жеңіске жетеледі. Араға төрт минут салып, «Тараз» командасы таразы басын теңестірді. Предраг Говедарица қанжығасын майлады. Кездесудің алғашқы бөлігі 1:1 есебімен аяқталды. Ойынның екінші жартысында «Тараз» футболшылары жылдам шабуылдарға арқа сүйеді. 52-минутта Предраг Говедарица дубль авторы атанып, командасын есепте алға шығарды. Бұдан соң кездесудің 60-минутында Константин Дудченко өз мүмкіндігін мүлт жібермей, есепті 3:1-ге жеткізді. Осы сәтте «Тараз» футболшылары енді жеңісті уыстан шығармайды деп топшылағанбыз. Алайда 77-минутта Аслан Еркен 11 метрлік айып добын орындап, есеп айырмасын қысқартты. Кездесудің 82-минутында Думан Тұрсынбай еншісіне 1 гол жазып, ақтық нәтижені тіркеді. Қорытынды есеп – 4:2. «Тараздың» пайдасында. «Екібастұз» командасынан айласын асырып, үш ұпайды қоржынға салған «Тараз» футбол клубы үздіктер қатарында келеді. Дегенмен бірінші лигада көш тізгінін қолға алу үшін жамбылдық футболшыларға алдағы ойындарда да жеңісті жорықты жалғастыру керек-ақ.

Табиғат АБАИЛДАЕВ.