Ресейлік ТНТ арнасындағы "Песни" шоуында өнер көрсеткен Назима Жәнібекованың танымалдылығы артып келеді. Аз уақыттың ішінде оның желідегі парақшасына алты мың адам қосылып, 27 жастағы бойжеткеннің тасы өрге домалай бастаған. Назима hommes.kz сайтына сұқбат беріп, аталған жобаға қалай келгенін айтып берді. 

Бір күннің ішінде "жұлдыз" болып оянған ол бұл жобаға қалай келгенін айтты. Назима "Песни" шоуына қатысуға өтінішті досының кеңесімен жасағанын айтады. Жобаға қатысу оңай болмаған. Үміткерлер бір минуттың ішінде өз қабілетін көрсетіп, мойындатып үлгеруі керек болған.

Осылайша қатаң мамандардың алдында ол өз өнерін көрсетіп, қабілеті зор екенін дәлелдеген. "Мәскеуде көптеген адамдар менің қай жақтан келгенімді сұрап әлек болды. "Қазақтар сондай талантты" дегендер де аз болмады. Мұны естігенде қуаныштан жүрегің жарылардай күйде боласың", - дейді Назима.