Ережесіз жекпе-жек кеші Almaty Arena спорт кешенінде ұйымдастырылды. Отандасымыз бес кезеңде де басымдылық танытып, қарсыласы – Тайсон Нэмді ұпай санымен жеңіп кетті.

«Шынымды айтсам, Жалғастан осындай кездесуді күтпеген едім. Ол мықтылығын дәлелдеп, менің соққыларыма төтеп берді», - деді Тайсон Нэм.

Жалғас барлық келушілерге өз алғысын білдіріп, қуанышын жасырмады.

«Тайсон мықты, әрі шебер спортшы. Бүгінгі жеңісіме ризамын. Соңғы раундқа дейін күресемін деп шыққан болатынмын, мақсатымды орындадым. Өз елімнің туын көкке желбірете бергім келеді. Алға, Қазақстан!» – деп өз ойымен бөлісті ол.

Айта кетсек, бұл турнир аясында жалпы саны 11 кездесу ұйымдастырылды. Олардың төртеуі АDCC ережесі бойынша өткізілді. Басты кездесуде Ержан Естанов (Қазақстан) пен Расул Мирзаев (Ресей) 65.9 келі салмақта шыққан болатын. Алайда, ресейлік спортшы ұпай саны бойынша жеңіске жетті. Өз кезегінде Ержан Естанов жанкүйерлердің үмітін ақтамағаны үшін кешірім сұрады, ал Расул болса жанкүйерлердің қолдауына алғыс білдірді.

«Мен өзімнің туған күнімді осымен Алматыда үшінші рет тойладым. Бұл жер менің туған қаламдай болып кетті. Бүгінгі кездесу тамаша өтті. Өз қарсыласыма жақсы кеш үшін алғыс айтамын. Ержанға қолдау көрсетіп қойыңыздар. Ол аянбай соңына дейін күресті», - деді Расул Мирзаев.

Сонымен қатар, казахстандықтардың қатарында Мансұр Хабибула (грепплинг), Мұратбек Қасымбай, Даурен Ермеков, Жұман Жұмабеков (ММА) жанкүйерлерді жеңісімен қуантты.