Шымкент қаласында өткен жарыста боксшы жастар Оңтүстік Қазақстан облысы әкімінің жүлдесін сарапқа салды. Көршілес қырғыз, өзбек, тәжік, қытай елдерінің де спортшылары қатысуымен халықаралық турнир биыл бесінші рет ұйымдастырылып отыр. Бұл додада жамбылдықтар жақсы өнер көрсетті. Жарысқа апарған алты спортшының үшеуінің қанжығасы майланып, жетістікке жетті. Атап айтсақ, жерлестеріміздің еншісінде бір алтын, бір күміс, бір қола медаль бар. Жүлдегер атанған жастар – облыстық №6 олимпиада жеткіншектерін даярлайтын балалар мен жасөспірімдер бокс мектебінің (директоры Шоқан Досымбек) түлектері. Жеңіс тұғырынан көрінген Тараз инновациялық-гуманитарлық университетінің студенті Мұхамед Мырзатай Берді Нұржановтың шәкірті болса, Мұхамедке есе жіберіп, күмісті місе тұтқан (Жамбыл политехникалық колледжінде білім алуда) Жасұлан Әлімбекті Мұрат Әбімселімов жаттықтырады. Сондай-ақ, 69 килограмм салмақ дәрежесінде сынға түсіп, қола жүлдегер атанған Ерлан Рахмановтың да бапкері Берді екенін айта кету керек.

Әшірәлі КЕНЖЕҒАРА, облыстық олимпиада жеткіншектерін даярлау орталығының қызметкері.