Хорватияға қарсы кездесуде Неймар білгенінен жаңылмады. Алғашқы сәтсіздіктен соң бразилиялықтар шабуылды үдете түскен. Бірінші таймның 29-минутында Неймар есепті теңестіріп, командаластарын алға сүйреген. Жарыс қожайындары үзілістен кейін де өз екпіндерін бәсеңсіткен жоқ. Қарсылас қақпасының алдындағы кезекті таластың бірінде төреші айып добын белгіледі. Стандартты жағдайды орындаудың шебері саналатын шабуылшы мүлт кетпеді. Айтпақшы, Неймар құрама сапында да оныншы нөмірлі жейдеде өнер көрсетуде. Бұл оның бойтұмар белгісі секілді. Себебі, қай клубта ойнаса да, ол осы нөмірді таңдайды. Футбол королі атанған Пеленің жейдесінің нөмірі осындай болған. Бәлкім, бразилиялық шабуылшы ырым қылып сол санды таңдаған шығар. Иә, қалай десек те, дубльдің авторы атанған неймар Бразилия құрамасының тарихындағы он үздік сұрмергеннің қатарына енді. Әлем чемпионатының алғашқы «сары қағазының» да иегері осы ойыншы.

Ардақ Үсейінова,

"Ақ жол".