Бүгін Бразилияда футболдан әлем чемпионаты басталады

Әлем чемпионаттары басталмай жатып-ақ, бұл додада кімдердің жеңіске жетуі мүмкін екендігі жайлы түрлі болжамдар жасалуда. Басым көпшілігі футбол тарихына сүйеніп айтылса, кейбіреулер команданың сапындағы футбол «жұлдыздарының» санына қарай жорамалдауда. Қалай десек те, аламанда айтулы аяқ доп шеберлерінің өнерін жанкүйерлер жіті бақылайтыны анық. Ендеше, «жұлдыздар» өнер көрсететін құрамаларды санамалап көрейік.

«жұлдыздар»

қай елдің командасында?

Әлемдегі ең танымал футболшы – португалиялық Криштиану Роналду. Португалия құрамасының шабуылшысының командаға тигізер пайдасы көп екендігінде дау жоқ. Бірақ, Роналдудың денсаулығы дүбірлі дода алдында ептеп сыр беріп қалған тәрізді. Бұл туралы Португалия футбол федерациясының сайтында жазылған. Дүбірлі додада Лионель Мессидің фанаттары Аргентина құрамасына жанкүйерлік танытатыны белгілі. Дүниежүзіндегі танымал футболшылардың тізімінде екінші орында тұрған Месси осы аламанда да аянып қалмайтыны анық. Босния-Герцеговина, Иран және Нигерия құрамаларымен бір топқа түскен команданың сапында Мессимен бірге шабуыл өтінде Серхио Агуэро («Манчестер Сити»), Гонсало Игуаин («Реал»), Эсекьель Лавесси («ПСЖ»), Родриго Паласио («Интер»), Франко ди Санто («Вердер») өнер көрсетеді. Үздік сұрмергендердің бірі Бразилия құрамасында өнер көрсететін Неймар. Ал Италия құрамасының әлем чемпионатындағы басты «қаруы» – Марио Балотелли. Мамандар 23 жасар футболшы ұстамды бола алса, әлемді әлі талай таңғалдырады дейді. Мінезді ойыншылардың бірі Испания құрамасында. Испания азаматтығын алған бразилиялық Диего Коста мадридтік «Атлетико» сапында өнер көрсетеді. Жасыл алаңда кездескенді «жапырып» өте жаздайтындардың бірі – голландиялық Найджел де Йонг. Ақырғы секундқа дейін командасы үшін тер төгетін Найджел төзімді спортшы. «Әке-көкелемесе» анша-мұнша айтқанға көнбейтін ойыншы Ресей құрамасында да бар. Игорь Денисов пен Роман Широковты солардың қатарына жатқызуға болады. Ал колумбиялық Марио Йепес үшін Бразилиядағы чемпионат оның спорттық карьерасындағы соңғы дода болуы мүмкін. 29 жастағы қорғаушы ең дөрекі ойнайтын футболшы ретінде танылған. Уругвайлық Луис Суарес – Англияның Премьер Лигасындағы үздік сұрмергеннің бірі. Бірақ, дарынды футболшының «еркетотайлығы» да жоқ емес. Бүгін Бразилияда футболдан әлем чемпионатының жалауы желбіреді. Ертең алғашқы ойын алаң қожайындары мен Хорватия құрамасы арасында өтеді. Сондай-ақ, В тобындағы Испания мен Нидерланды командалары арасындағы кездесу де осы күні өтеді деп жоспарланған. 14 маусымда жанкүйерлер В тобына түскен Чили мен Австралия, С тобындағы Колумбия мен Греция, Д тобындағы Уругвай мен Коста-Рика құрамаларының ойындарын тамашалай алады. Жексенбіде де төрт бірдей матч болады.