Венгрия құрамасымен өткен жолдастық кездесуден үлкен жаңалық күткенімізді жасыра алмаймыз. Жанкүйерлердің де ұлттық құрамаға шақырту алған футболшылардың тізіміне қарап осылай ойлағаны анық. Әсіресе, ішкі біріншіліктегі матчтарда ойынынан мін табылмайтын Марат Хайруллиннен, «Шахтердің» капитаны Андрей Финонченкодан, Польшаның «Корона» сапында өнер көрсетіп жүрген Сергей Хижниченкодан бір үміт күткен едік. Бірақ, бапкер Юрий Красножанның көңілінен шыққан ойыншылар сенімді ақтамады. Қазақстан құрамасы «ә» дегенде қорғанысы әлсіз екенін байқатып алды. «Қайрат» командасының қорғаушысы Александр Кислицын көп қателесті. 2:0 есебін еселеп, өз қақпасына гол соққаны болмаса, Германиядан шақыртқан легионер Энгельдің де өз ойыншылары­мыз­дан асып түсетін өнері жоқ секілді. Сондай-ақ, екінші таймда Финонченконы алмастырған тараздық жас футболшы Бауыржан Исламхан, «Тараз» клубының сапына биыл ғана қосылған Алексей Щеткин мен Хайруллиннің орнына алаңға шыққан Асхат Тағыберген ойын мәнерін ептеп өзгертуге тырысты. Дегенмен, жеңіске жету үшін бұл жеткіліксіз еді. Осы ойында жаңа құраммен өнер көрсеткен Венгрия құрамасының жас ойыншыларына Қазақстан құрамасымен болған кездесу кезекті сынақтың бірі болды. Қысқасы, жолдастық кездесуде де жолымыз болмады, таблодағы 3:0 көрсеткіші өзгеріссіз қалды.

Ардақ Үсейінова,

"Ақ жол".