Бүкіләлемдік бокс сериясының жетінші маусымын Ресейде жергілікті боксшыларды жеңіп, сәтті бастаған «Астана арландары» командасы 18 наурызда Талдықорғанда «Өзбек жолбарыстарын» қабылдайды. Кездесуде С2 салмақ дәрежесіндегі оғландар бақ сынайды. Бүгінде маңызды кездесуге дайындықты пысықтап жатқан қазақстандық команда боксшыларына деген сенім мол. Біз спорт сайттарынан аталмыш шайқаста кімдер команда намысын қорғайтынын таба алмаған соң, команданың жаттықтырушысы Нұрлан Ақүрпековке хабарласып, мән-жайды білген едік. «Шыны керек, әлі ешкімге ақпарат берген жоқпын. Соңғы сәтке дейін қарсыластарға сыр алдырмасақ деп ойлап отырмын. Олар білмесе дұрыс болар еді. Ал өзбектердің құрамын сұрасаң айтар едім», – деп сөз саптаған Нұрлан Ақүрпеков бізге «Астана арландарының» дайындығы туралы айтып берді. Естеріңізге сала кетейік, бірінші кезеңде өзбекстандық өрендер сырт алаңда Қытай боксшыларына жол берген.

Табиғат АБАИЛДАЕВ, «Ақ жол».