Мамандар дерегінше, шылым шегу салдарынан дендейтін дерттен жыл сайын 6 миллион адамның ажалы жетеді. Енді әлем елдері бірлесе отырып, осы қасіреттің алдын алмаса, құрбандар қарасы қалыңдай берері даусыз. Жыл сайын темекі тартып, түрлі ауру сатып алған 6 миллион адам дертіне шипа дарымай, көз жұмады. Жаман айтпай, жақсы жоқ. Мамандар 13 жылдан кейін өкпесін улап, өмірден озатындар саны артуы мүмкін деп дабыл қағып отыр. Бұдан басқа, әлем экономикасына шылым шегуден 1 триллион доллардан астам шығын келеді. Яғни ем-домға қыруар қаржы жұмсалып, еңбек өнімділігі қатты құлдырайды.
«2030 жылға қарай темекі тартып, бақилық болғандар бүгінгі күні 6 миллионнан 8 миллион адамға жетуі мүмкін. Оның үстіне, осындай өлім-жітімнің 80%-ы табысы төмен және орташа деңгейдегі елдердің үлесінде», - дейді Дүниежүзілік денсаулық сақтау ұйымының маманы Джереми Пол.
Ұйымның есебінде тың деректер келтірілген. Қазір әлем халқының 21%-ы – 15 жастан асқандар. Бұл бір миллиардтан көп. Шамамен ерлердің 35%-ы, қыз-келіншектердің 6%-ы – шылымға құмар. Оның ішінде осы 25%-ы – кедейшілік қамытын кигендер. Сондықтан шылым шегумен күресу үшін себеп жеткілікті. «Бұл майдан экономикаға ауыртпалық салады» деген биліктің уәжі шындыққа жанаспайды, деп хабарлайды Хабар 24.
«Көптеген елдің билігінде темекі тартуға қарсы күрес экономикаға теріс әсер етеді деген қорқыныш бар. Бірақ бұл үрейге бой алдыруға еш дәлел жоқ. Ғылым әрекетке көшу керек деп нақты бағыт-бағдар беріп тұр. Сондықтан бәрі саяси ерік-жігерге келіп тіреледі. Алайда құзырлы органдар бұл тұрғыда белсенділік танытпай отыр. Расында темекі өнімдеріне салық көлемін арттырған елдер адамдардың өмірін сақтаумен бірге есепсіз табысқа кенелер еді», - дейді Дүниежүзілік денсаулық сақтау ұйымының маманы Джереми Пол.
Мамандардың жағымды жаңалықтары да жоқ емес. Зерттеу бойынша темекі тарту қазір сәнді үрдіс болудан қалып барады. Жалпы жыл сайын көк түтінді құшырлана сорып, соңында сорлайтындар саны азайып жатыр. Бірақ бәрібір әлемдегі демография өскен сайын жан басына шаққандағы шылымқорлар қатары да артып барады.
ақпарат көзі: Baq.kz
Ұқсас жаңалықтар
Туа біткен жүрек ақауын емдеудің жаңа әдісі табылды
- 17 қыркүйек, 2024
Тұмауға қарсы екпе салу басталды
- 17 қыркүйек, 2024
Ақпарат
Алматылық қос азаматтың жазасы жеңілдетілді
- 30 тамыз, 2024
Президент эстрада әншісін «Барыс» орденімен марапаттады
- 22 шілде, 2024
Газетке жазылу
«Aulieata-Media» серіктестігі газетке онлайн жазылу тетігін алғаш «Halyk bank» қосымшасына енгізді