Жамбыл жері даңқты спортшыларымен де жалпақ жұртқа белгілі болған құт мекен. Олимпиаданың бірнеше чемпионы да осы Әулиеата өңірінен шыққан. Олардың жұлдызды жолын жалғастырушы ізбасарлары да өсіп келеді. Талантты спорт саңлақтары түлеп ұшқан топырақтан әлі талай дарынды ұл мен қыздар туары анық. Сол том-том кітапқа азық болатын мәліметтер «Жұлдызды Жамбыл спорты» жинағына енгізіліп, оқырманға жол тартты.

Бұл кітап «Жамбыл спорт» газетінің редакторы Марат Ахметов пен редакция қызметкерлерінің бастамасымен жарыққа шығып отыр. Әулиеата өңірінен шыққан Олимпиада чемпиондары мен жүлдегерлері, спорт ардагерлері мен облыстағы спорт клубтары, аудандар мен қалалардағы спорт мектептерінің мақтаныштары туралы деректер қамтылған жинақты Жамбыл спортының жылнамасы десек артық емес.

Ардақ Үсейінова, «Ақ жол».