Орталық коммуникациялар қызметінде «Зерде» Ұлттық ақпараттық-коммуникациялық холдингі» АҚ-ның Басқарма Төрағасы Мирболат Аюпов, Ақпараттық-коммуникациялық технологияларды дамыту қорының Бас директоры Санжар Кеттебеков, американдық Сars.com интернет-порталының негізін қалаушылардың бірі, «NewEggNorthAmerica» компаниясының Бас директоры Роберт Беллак, «MuckerLab и MuckerCapital» компаниясының негізін қалаушы, «Harrison Metal Capital» егістік венчурлық қорының басқарушысы Эрик Ранналдың қатысуымен брифинг өтті. Жиынның тақырыбы Астанада биыл екінші рет өтіп отырған ASTEX – 2014 халықаралық көрме-конференциясының қорытындысына арналады.

«ASTEX екі жылдан бері жұмыс істеп келеді. Көрменің алғашқы күнінен-ақ нәтиже көріп отырмыз. Қайда ұмтылуымыз қажет екенін білдік. Біз көрмеге мұндай қызығушылық болады деп күтпеген едік. Шараға 3200 адам келді. Оған өте беделді спикерлерді тарттық. Олардың қатарында Сars.com интернет-порталының негізін қалаушылардың бірі, «NewEggNorthAmerica» компаниясының бас директоры Роберт Беллак мырза да бар. Олар Қазақстанның ақпараттық-коммуникациялық технологиялар саласында ауыз толтырып айтарлық жетістікке жету үшін мүмкіндігі зор екенін атап өтті», – деді Санжар Кеттебеков. Брифингке жиналғандардың айтуынша, көрме конференцияда 41 спикер сөз сөйлеп, 42 компания ұсынылған. Сондай-ақ, 9 толық сессия, 2 шеберлік көрсетілім, 3 дөңгелек үстел, 17 екі жақты кездесулер ұйымдастырылған. «ASTEX-2014» көрмесін ҚР Көлік және коммуникациялар министрлігі, «Зерде» Ұлттық ақпараттық-коммуникациялық холдингі және «Ақпараттық-коммуникациялық технологияларды дамыту қоры» ұйымдастырып, өткізді. Шара барысында электрондық коммерция және логистика, электрондық бизнес саласындағы инновациялық өнімдер, B2C және B2B-де ақпараттық коммуникациялық технология саласын дамыту мәселелері талқыланып, голографиялық визуалдаудың соңғы технологиялары, 3D-принтерлер мен АКТ саласындағы өзге де жаңашылдықтар ұсынылды.

Фариза Әбдікерімова, «Ақ жол».