Минск қаласында жалауын көтерген хоккейден әлем біріншілігі Қазақстан ұлттық құрамасы үшін жеңіліспен басталды. Кеше айдынға Германия хоккейшілерімен шыққан жерлестеріміз негізгі уақытта тең ойнап, буллит сериясынан ұтылып қалды. "Арена-Минск" айдынында өткен кездесудің негізгі уақыты 1-1 есебімен аяқталған. Алғаш болып қарсыластың қақпасына шайбаны 11 минутта қазақстандық Андрей Гаврилин соқты. Кевин Даллмэн мен Федор Полищуктің пасын ұтымды пайдаланған Андрей ұтымды сәтті мүлт жіберген жоқ. Ал, осы бірінші кезеңнің соңғы минутында Германия тарапынан Маттиас Плахта есепті теңестіріп, командасын жеңілістен құтқарып қалды. Осы тең есеп негізгі уақытта да, овертаймда да сақталып, ойын тағдыры буллит сериясында шешілген болатын. Қазақстандық Дмитрий Уппердің бір шайбасына немістер екі шайбамен жауап қайтарды. Қорытынды есеп 2:1, Германияның пайдасында. Бүгін жерлестеріміз алаң иелері Беларусь хоккейшілерімен бақ сынасады. Ойын Астана уақытымен 20.30-да басталмақ.

Ақпарат көзі: www.nur.kz