Қазақстандық кәсіпқой боксшы Қанат Ислам келесі кездесуін 7 қараша күні АҚШ-тың Майами қаласында өткізеді. Отандасымыздың кәсіби бокстағы 20-шы жекпе-жектегі қарсыласы – 34 жастағы мексикалық Алексис Камачо. Алексис Камачо бұған дейін 26 жекпе-жек өткізген. Ол оның 21-інде жеңіске жетіп, бесеуін жеңіліспен аяқтады.

Мәліметтерге сүйенсек, бұл кездесу он раундқа созылады және сол кештегі ең маңызды жекпе-жек болмақшы. Еске сала кетейік, 31 жастағы Қанат Ислам кәсіби рингте 19 жекпе-жек өткізіп, барлығында жеңіске жеткен. Ол бірінші орта салмақта WBA Fedelatin титулына иелік етеді. Соңғы кездесуінде ол колумбиялық Орландо де Хесус Эстраданы 4-раундтың алғашқы минутында нокаутпен жеңді. Айта кету керек, Қанат Ислам жақында кәсіпқой бокстағы әлемнің үздік компанияларының бірімен келісімшарт жасауды жоспарлап отыр.

Жанғазы АХМЕТ, «Ақ жол».