Жыл сайын 9 мамыр – Жеңіс күні қарсаңында ардагерлер арасында бильярдтан немесе шахмат­тан жарыс өткізу дәстүрге айналған. Ардагерлер үшін әсіресе, шаршы тақта алдын­дағы кездесудің жөні бөлек. Бір жағынан ой сергітетін ойын әрі өзара бас қосып, әңгіме шертетін мүмкіндік. Биыл дәстүрлі шараны өткізуге Тараз қаласындағы «Триумф» сауда үйі демеушілік жасапты. Әрбір ойыншыға бес мың теңгеден ынталандыру сыйлығын беріп, ардагерлерге ақ дастарқан жайды. Облыстық ардагерлер кеңесі төрағасының орынбасары Әмірбек Дәуреновтің айтуынша, жеңімпаздарды анықтау үшін жарыс олимпиадалық жүйемен өткізіліпті. «Сыйлық бірдей болғанымен, жүлдегерлер нағыз бәсекеде анықталды», – дейді ол. Шаршы тақтадағы жарыста Совет Ғалиакпаров жеңімпаз деп танылды. Екінші орынды Әмірбек Дәуренов, үшінші орынды Арғынбай Бекбосын иеленді. «Біз мұндай басқосуларда қоғамда болып жатқан мәселелерді қозғап, әңгімелесеміз. Ортақ проблемаларды шешудің жолдарын қарастырамыз. Екінші жағынан бір-бірімізбен жарысып, ой сергітеміз. Сондықтан, мұндай шараларға қалмай қатысамын», – дейді облыстық ардагерлер кеңесінің мүшесі Совет Ғалиакпаров.

Ардақ Үсейінова, «Ақ жол».