Мына бір жаңалық елең еткізбей қоймады. Кеше ғана Германияның 21 жасқа дейінгі бұрымды боксшыларының арасында Таразда туған Мәдина Асанова күміс жүлдегер атаныпты. «Қазақстан» арнасындағы «Сенбілік кездесудің» қонағы болған Ермахан Ыбырайымов: «Тараз – боксшылардың шаһары» деген еді. Міне, соның дәлелі. Жалпы, Мәдина бес жылдан бері бокспен шұғылданып жүр екен. Бапкері – Андрей Блум да қазақ жерінен қоныс аударған. Ал жиырма жасар Мәдина – Тараздың тумасы. Әкесі Марат Асанов Лена есімді неміс қызына үйленіпті. Мәдина өмірге келгенде Германияға қоныс аударған көрінеді. Асановтар – бүгінде Вестфален Галле қаласының тұрғындары. Мәдина 2012 жылы бойжеткендер арасында Германия чемпионы атанған. 2013 жылы оған күміс жүлде бұйырыпты. Ересектер санатында 75 килограмм салмақта бақ сынап жүрген қазақ қызы финалда Жоэль Сейдоудан ғана жеңілді.

Ардақ  Үсейінова, «Ақ жол».