Өсиет

77

Өмірін мұсылмандықпен өткізген бір ана тұрмысқа шыққалы отырған қызына ардақты Пайғамбарымыздың (с.ғ.с.) сөздеріне сүйене отырып мынадай насихат жасады:
– Қарағым, қызым! Сен енді туып-өскен үйіңнен кетіп, қыр-сыры бейтаныс, бөтен бір үйге келін болып барасың. Мінез-құлқы да өзіңе беймәлім бір адаммен бас қосып, ғұмыр кешесің;
– Сен ол кісіге жердей бол, ол саған төбеңдегі көктей болады!
– Сен оған үй бол, ол үйдің тірегі болады!
– Сен оған күң бол, ол саған құл болады;
– Сен оны шаршатпа, сонда оның саған деген сезімі азаймайды;
– Сен одан алыстап ұзама, ол сені ұмытпасын;
– Сен әрдайым оның көзін, мұрнын және құлағын сақтаушы бол: ол сенен басқаға көз салмасын, өзгенің жұпарын иіскемесін, сенен ылғи жақсы сөздер ғана есітсін;
– Үйде отырып, үй шаруасымен, қол өнерімен айналыс;
– Ішіп-жеуге ол не әкелсе, соған қанағат қыл. Анау жоқ, мынау жоқ деп еш уақытта шағым жасама;
– Отбасындағы өз ақыңды алудан бұрын, күйеуіңнің ақысын беруге тырыс;
– Еріңнің туыстарын сыйлап, қадірле;
– Тазалық пен пәктікке аса көп мән бер!
– Көшеге шықсаң, етек-жеңі кеңдеу, жалаңаш денеңді жауып тұратын киім ки! Сенің тәнің күйеуіңе ғана арналған аманат екенін ұмытпа!
– Көршілеріңмен тату бол, олардан зиян келсе сабыр ет, шыда! Біреудің сөзін біреуге тасып өсекші болма!
– Әсіресе, құлшылықтарыңа мұқият бол. Уақыты кірген намазды дереу оқуға асық;
– Шырағым, қызым! Мен енді қырық жылдық тәжірибеме сүйеніп, бірқатар сөз айтамын. Соларды жадыңа тоқы, сонда бұл дүниеде де, мәңгілік өмірде де бақытты боласың;
– Қанағатшыл бол! Қанағат қарын тойғызып қана қоймайды, жүрекке де тыныштық әкеледі;
– Саған айтылған сөздерді жақсылап тыңдап жүр, күйеуіңнің шариғатқа теріс келмейтін барлық тілектерін орында!
– Үйіңдегі әр нәрсе мұнтаздай таза және орын-орнында жиюлы тұрсын;
– Күйеуіңнің ас ішетін және ұйықтайтын уақытына абай бол! Аштықпен жаман мінез көрсетіп, ұйқысыздықпен ашулануы мүмкін;
– Үйіңдегі бұйымдар мен мал-мүліктің қорғаушысы бол. Жасаған жақсылығыңды еш уақытта міндет қылма. Жақсылыққа-жақсылық тез ұмытылады, ал жамандыққа жақсылық оңайлықен ұмыт болмайды;
– Күйеуіңнің қателіктерін байқасаң, ешкім жоқ, оңаша жерде ғана жұмсақ тілмен ескерт;
– Жарыңның сырларын тірі жанға жаюшы болма! Ерлі-зайыптының сырлары қабірге бірге көмілуі керек;
– Жарың қуанса сен де бірге қуан, қайғырса сен де бірге мұңай! Оған өмірдің әр сәтінде жақсы бір дос бол!
– Өтірік сөзден аулақ бол! Өйткені өтірік отбасын іштен бүлдіретін жегі құрттан да жаман;
– Араларыңда түйткіл шықса, екеуің бірге отырып өздерің шешіңдер! Ондай сөздердің әкең екеумізге немесе басқа адамға айтып бармаңдар!
– Күйеуіңнен шамасы келмейтін нәрсені ешқашан сұрама!
– Көркем мінезді жақсы әйел күйеуіне жұмақ нығметі екенін ұмытпа! Сен де жарыңа жәннат нығметі бол, оған азап шектірме!
– Бұл айтылғандарды өзіңнен бұрын күйеуіңді ойлағанда ғана жүзеге асатынын біл! Менің айтқаным ғана бола берсін деген мінезбен бұларды ешқашан орындай алмайсың;
– Егер бес уақыт намазыңды оқымасаң, кесір-кесапат ретінде осының өзі саған да, күйеуіңе де, бала-шағаңа да жеткілікті болады;
– Ғұсылың мен дәретіңе ешқашан жеңіл қарама!
– Бұл айтылғанның пайдасын көрулерің үшін, ең алдымен, иман мен ниет-ықыластарың таза, дұрыс болуға тиіс. Не сөйлеп, не жасассаңдар да, ең алдымен, Алланың разылығын іздеңдер! Сонда ғана екі дүние шаттығына сөзсіз кенелетін боласыңдар!

Comments are closed.