Ол республиканы жемісті басқарып, мемлекеттің дамуы жолында аянбай тер төкті. Тіпті, көптеген ауыр мәселелермен бетпе-бет келіп, қарапайым халық жағында болды. Ол жауапты қызметін тапсырғаннан кейін де халықпен бірге жүріп, елдің ортасынан кеткен жоқ. Қазіргі таңда елімізде үлкен қалаға және бірнеше мектеп, көше, орталықтарға дара тұлғаның есімі берілген. Еліміздің еңкейген қарты мен еңбектеген сәбиіне дейін Дінмұхамед Ахметұлы есімін ардақтап, рухына құрметпен қарайды. Әрқашан адалдықты ту еткен, ел мүддесін жоғары ұстаған биік тұлға мұндай құрметке әрқашан лайықты. Дара тұлғаның туған күніне орай Дінмұхамед Қонаевтың Тараз қаласындағы еңселі ескерткішіне гүл шоқтарын қою рәсімі өтті.

Алдымен облыс әкімі Ербол Қарашөкеев зиялы қауыммен бірге қазақ халқының аяулы перзентінің ескерткішіне гүл шоқтарын қойып, рухына тағзым етті. Ақын, халықаралық «Алаш» әдеби сыйлығының иегері Маралтай Райымбекұлы да жиналған көпшіліктің ортасынан табылды. Ол Д.Қонаевтың биік қасиетін қамтып жазған бірнеше өлеңнің авторы. Мұнан соң облыстық мәслихаттың төрағасы Абдалы Нұралиев, облыстық қоғамдық кеңестің төрағасы Дүйсенәлі Бықыбаев, ардагерлер кеңесінің төрағасы Еркінбек Солтыбаев, билер кеңесінің төрағасы Оңласын Есіркепов бастаған азаматтар да дара тұлғаның рухына құрметтерін көрсетті.

Тараз қаласының әкімі Бақытжан Орынбеков бастаған тараздық ардагерлер мен зиялы қауым да бұл сауапты істен шет қалған жоқ. Сонымен қатар жоғары және арнаулы оқу орындарының ғалымдары мен оқытушылары, студенттері, желтоқсаншылар, халықаралық «Қонаев қоры» облыстық филиалының мамандары, «АulieataMedia» жауапкершілігі шектеулі серіктестігінің бас директоры Данияр Асқарұлы, Қазақстан Журналистер одағы облыстық филиалының төрағасы Жаңабай Миллионов бастаған белсенді азаматтар, облыстық және Тараз қалалық мәслихаттың депутаттары, департаменті, басқармалар мен бөлім басшылары, қоғамдық және саяси ұйымдардың, жастар орталықтарының өкілдері, әскери бөлімдердің сардарлары мен сарбаздары, Тараз қаласының бірқатар тұрғындары дара тұлғаның ескерткішіне гүл қойып, құрметтерін көрсетті.

«Бүгін өте ерекше күн. Қазақ халқының дара тұлғасы, ұлт жанашыры Дінмұхамед Қонаевтың туған күні. Ескерткішіне гүл шоқтары қойылып, ізгі іс жасалып жатыр. Халықтың көп жиналуы тараздық тұрғындардың дара тұлғаға деген шексіз құрметі деп танимыз. Мұндай құрметті барлық аудандар мен ауыл тұрғындарының қолдауынан да аңғаруға болады. Себебі Қонаев – елге нағыз жанашыр болған, әр қазақтың жүрегіне еніп кеткен, жастардың жол бастаушысына айналған дара тұлға. Дара тұлғаның жасампаз істерін ұмытпау ұрпақ парызы. Халықаралық «Қонаев қоры» облыстық филиалы бұл парызды үнемі есінде ұстайды. Дара тұлғаға арналған спорттық жарыстар, мүшәйралар, Қонаев оқулары үнемі ұйымдастырылып келеді. Дінмұхамед Қонаевтың көзін көрген, тәрбиесін алған тұлғалармен де кездесу ұйымдастырып, бүгін жас ұрпаққа таныстыру жолында да нақты жоспармен жұмыс істеп жатырмыз. Бүгінгі іс-шара барысынан да дана ақсақал, Д.Қонаевқа деген халықтың шексіз ықыласын көріп, толқып тұрмыз», – дейді аталған филиал төрағасы Қибат Асқарбеков.

Гүл қою рәсімінен кейін де көпшілік дара тұлғаны еске алып, ғибратқа толы естеліктер айтып, өздерінің Дінмұхамед Ахметұлына деген шынайы көңілдерін көрсетті.

Есет ДОСАЛЫ