Волейболдан ұлттық лигада табысты өнер көрсетіп келе жатқан «Тараз» волейбол клубы «Тараз-Арена» спорт кешенінде өткен кіші турда кезекті мәрте өздеріне тең келетін қарсылас жоқ екенін дәлелдеді. Турдың алғашқы күнінде «Тараз» волейболшылары «Шығыс» команда­сынан төрт сетте айласын асырды. Алғашқы кезеңде қарсыластарына есе жібергеніне қарамастан, қалған үш партияда жерлестеріміз жеңісті жұлып алды. Доданың екінші күнінде басты қарсыластарымыз «Павлодар» командасымен күш сынасты. Бұл матчта да жеңіс біздің команданың еншісіне жазылды. Үш сетте «Павлодар» командасы ойсырай ұтылды. Үшінші ойында да «Тараздың» асығы алшыдан түсті. Азулы «Алматы» командасы «Таразға қарсы ойында бір кезеңде басымдық танытқанымен, қалған үш сетте жерлестеріміз шүбәсіз жеңді. Кіші турдан кейін біздің волейболшылар екінші орындағы «Павлодардан» 13 ұпайға ұзап кетті. Енді 11-17 ақпан аралығында Таразда жалпы тур өтеді.

Табиғат АБАИЛДАЕВ, «Ақ жол».