Аталған жүйе төмен орбиталық спутниктерге негізделген. Мұндай технология шалғай елді мекендерге жоғары жылдамдықтағы интернет жеткізуге мүмкіндік береді. Бұл – талшықты-оптикалық желі тарту қиын немесе қымбат өңірлер үшін тиімді шешім. Жоба ауылдық мектептерді, медициналық мекемелерді, мобильді қызметтер мен әлеуметтік инфрақұрылым нысандарын сапалы байланыспен қамтамасыз етуге бағытталған.

– Цифрлық даму, инновациялар және аэроғарыш министрлігі ел аумағында цифрлық қызметтерді дамытуға бағытталған кез келген технологиялық бастамаларды қолдап, азаматтардың сұранысына жұмыс істеуге дайын. Осы мақсатта ынтымақтастықты дамыту мақсатында қазақстандық делегация Шанхайдағы Shanghai SpaceSail кеңсесіне барып, компанияның технологияларымен және өндіріс барысымен танысты. Кездесу барысында тараптар бірлескен жобалар мен ұзақ мерзімді серіктестік мүмкіндіктерін талқылады. Компания келер жылы Қазақстанда ресми жұмысын бастауды жоспарлап отыр, – деді Цифрлық даму, инновациялар және аэроғарыш министрі Жаслан Мадиев.

Жыл басында Халықаралық қаржы орталығында SpaceSail Kazakhstan Limited компаниясы тіркелген болатын. Бұл – Shanghai SpaceSail-дің Қазақстандағы еншілес ұйымы. Бүгінде сарапшылар тарапынан компания Илон Масктың Starlink жүйесіне балама ретінде қарастырылуда.

Айта кетейік, 2025 жылдың үшінші тоқсанында Қазақстанда Starlink спутниктік терминалдары ресми түрде күзде сатылуы тиіс. Алдын ала болжам бойынша оның құны 500 доллардан басталуы мүмкін.

Нұрболат АМАНБЕК