Әскери қызмет – Отан алдындағы қасиетті борыш. Бұл күнде еліміздегі іргелі оқу орындарында болашақ офицерлерді дайындайтын әскери кафедралар бар. Аталған кафедрада тек әскери білім беріп қана қоймай, патриоттық рухты нығайтуға және болашақ сарбаздардың жауапкершілік сезімін қалыптастыруға қолайлы жағдай жасалады. Жалпы, әскери кафедра – еліміздің қорғаныс қабілетін арттыруға үлес қосатын беделді құрылымдардың бірі. Өткен ғасырдың белгілі бір кезеңінде елімізде әскерге қажетті кадрларды даярлау мақсатында кафедралар құрылған. Бүгінде сол кафедраларда көптеген студентке әскери білім беріліп, олардың кәсіби және рухани дамуына ықпал етуде.
Қазақстан Республикасының әскери доктринасына сәйкес, әскери білім беру жүйесі мемлекеттің қорғаныс қабілетін арттыруға бағытталған. Әскери кафедра осы мақсатты жүзеге асырудың маңызды құралдарының бірі ретінде жоғары оқу орнында білім алып жатқан жастарды әскери қызметке баулиды. Мұнда жастар тек теориялық білім алып қана қоймай, әскери техниканы меңгеріп, тактикалық дайындықтан өтеді.
Айта кетейік, әуе шабуылына қарсы қорғаныс – ел қауіпсіздігін қамтамасыз етудің стратегиялық маңызды бағыты. Бұл салада қызмет ететін мамандар әуе кеңістігін қорғау, радиолокациялық жүйелерді пайдалану, қарсылас ұшақтары мен зымырандарын анықтау және оларға қарсы қорғаныс шараларын жүргізу бойынша кәсіби дайындықтан өтеді. Студенттер оқу барысында радиолокациялық құрылғылармен жұмыс істеуді, әуе нысаналарды бақылау жүйелерін басқаруды, сондай-ақ әуе шабуылына төтеп беру тактикасын үйренеді.
Теориялық білімді тәжірибемен ұштастыру мақсатында әскери кафедрада түрлі тренажерлер мен заманауи симуляциялық құрылғылар қолданылады. Сонымен қатар әскери дайындық көшбасшылық қасиеттерді дамытуға, тәртіп пен жауапкершілікті қалыптастыруға ықпал етеді. Әуе шабуылына қарсы қорғаныс циклының 123 взводының студенті Иманғали Ұланұлының айтуынша, әскери кафедрада алған білімі мен тәжірибесі болашақта елдің қорғаныс саласында қызмет етуіне негіз болмақ. Ол өз сөзінде бұл оқу – оның кәсіби біліктілігін арттырумен қатар, нағыз патриот ретінде қалыптасу жолы екенін айтты. Бастысы, оларға бұл жолда кәсіби дағдылар мен әскери құндылықтарды меңгеруге жетекші оқытушылары айрықша үлес қосуда.
– Әуе шабуылына қарсы қорғаныс саласында сапалы білім алу үшін тәжірибелі оқытушылардың рөлі ерекше. Маған әскери дайындық жолымда запастағы полковник, аға оқытушы Қанатбай Әлиев, запастағы подполковниктер, аға оқытушылар Сүлеймен Ерімбетов және Николай Литвяк сынды білікті мамандардан дәріс алу үлкен мүмкіндік деп санаймын. Ал Қанатбай Әлиев – өз ісінің маманы, әскери тактика мен қорғаныс жүйелерін терең меңгерген ұстаз ретінде сабақ барысында әскери тәжірибесімен бөлісіп, студенттерге әскери қызметтің жауапкершілігі мен маңызын түсіндіреді. Осындай тәжірибелі мамандардан білім алу – мен үшін үлкен жетістік, өйткені олардың тәжірибесі мен тәлімінің арқасында мен әскери қызметтің қыр-сырын меңгеріп, өзімді кәсіби тұрғыдан жетілдірудемін. Әскери кафедраның циклында білікті мамандардан білім алу – тек теориялық дайындық қана емес, болашақ кәсіби қызметке дайындалу деген сөз. Ұстаздарымыз өздерінің мол тәжірибесі арқылы бізге патриотизмді, тәртіпті және көшбасшылық қасиеттерді үйретуде. Сапалы әскери білім алу тек техникалық дағдыларды үйрену емес, сонымен қатар жеке тұлғалық қасиеттерді жетілдіру екенін түсінемін. Ұстаздарымыз бізді тәртіпке, жауапкершілікке, көшбасшылыққа баулиды. Осындай тәлімгерлерден білім алу – мен үшін үлкен құрмет. Болашақта алған білімімді елдің қорғаныс саласына үлес қосу үшін қолдануды мақсат етемін. Әскери кафедра – тек теориялық сабақтар өтетін орын емес, тәжірибелі ұстаздардан тәлім алып, нағыз офицер ретінде қалыптасатын орта. Оқытушыларымыздың білімі мен тәжірибесі бізге әскери қызметтің қыр-сырын меңгеруге мүмкіндік беріп, жауапкершілік пен патриотизмді ұштайды, – дейді ол.
Қорыта айтқанда, іргелі оқу орындарындағы кез келген әскери кафедра – болашақ офицерлер ұстаханасы. Бұл жерде алған білім мен тәрбие тек әскери дайындықтан өту үшін ғана емес, сонымен қатар өз болашағын жауапкершілікпен жоспарлауға мүмкіндік береді. Демек, әскери кафедрада оқу – ертеңгі күні еліңе қызмет етудің алғашқы қадамы.
Есен ӨТЕУЛІ
Ұқсас жаңалықтар
