Қорағаты станциясынан ашылған фельдшерлік- акушерлік пункт 15 келушіге арналған. Жоба құны 245,5 миллион теңгені құраған жаңа медициналық нысанның құрылысын «Синдикат груп» жауапкершілігі шектеулі серіктестігі жүргізген.

Жаңа медициналық мекеменің ашылу салтанатына қатысып, қорағатылықтарды қуаныштарымен құттықтаған аудан әкімі Ернар Есіркепов аудан аумағында 2024 жылы ауқымды істер атқарылғанын айтты. Аудандық мәслихат төрағасы Ербол Әбутәліпов те лебізін жеткізіп, фельдшерлік-акушерлік пункттің аға дәрігері Балнұр Әбдіәкімқызына жаңа ғимараттың «Символикалық кілтін» табыстады.

Ал, Жаңатұрмыс ауылында «Ауыл – ел бесігі» бағдарламасымен жаңа спорт кешені бой көтеріп, пайдалануға берілді.

– Ауылымызда 2022 жылы ашылған дәрігерлік амбулатория бар. Жаңа ауыз су ғимараты салынып, жұрт сапалы әрі таза суды тұтынып та отыр. Газ да тартылған. Жаңа мәдениет үйі бой көтеріп, құрылысы жүріп жатыр. Ендігі ауыл тұрғындары сұраған мәселе – спорт кешені болатын. Аудан әкімі Ернар Серікәліұлы бастаған атқарушы билік өкілдері, өзіміздің ауылдық округ әкімдігінің қызметкерлері қажетті жұмыстарды атқарып, нәтижесінде іргесі былтыр қаланған дене шынықтыру-сауықтыру кешенінің құрылыс жұмыстары толығымен аяқталды. Ашылуына аудан әкімі Ернар Есіркепов келіп, тілектестігін білдірді. Ауылымызда спортпен шұғылданатын жастарымыз аз емес. Байрақты бәсекелерде жеңіске жетіп, жүлдегер болып жүрген мақтаныштарымыз да бар. Енді өз ауылымызда спорттың әр түрінен жаттығуға мүмкіндік туды. Жеңімпаз жастарымыздың қатары көбейетініне сенеміз, – дейді ауыл әкімі Ерсайын Қуандық.

Спорт кешенінің лентасы қиылған сәтте аудан әкімі ауыл тұрғындары алдында «Балалар мен жасөспірімдер дене шынықтыру клубының» директоры Данияр Әлпейісовке үстел теннисінің толық жабдықтарын тарту етті. Қуанышты жаңалыққа тілектестік білдірген ауыл ақсақалы Көшкінбай Құрманалиев істің басы- қасында жүргендер мен ауылдастарына батасын берді.

Жаңатұрмыстағы жалпы құны 331 миллион теңгені құраған спорт кешенін «Нұр Тұрсын» жауапкершілігі шектеулі серіктестігі салған. Аталмыш мердігер компанияның директоры Талғат Тұрсымұратов та жүрекжарды лебізін жеткізді.

Сонымен қатар, Құлан ауылында тұрғын үйлер өз иелеріне табысталды. Махамбет Өтемісұлы көшесінің бойынан салынған 4 отбасылық 4 тұрғын үй әлеуметтік осал топ санатына жататын аудан аумағында тұратын 10 отбасыға берілді. Жаңа жылда жаңа қонысқа қонған азаматтардың қуанышын аудан әкімі Ернар Есіркепов арнайы барып бөлісіп, игі тілегін білдірді. Жаңа қоныс иелеріне құт болуын тілеген аудандық ардагерлер кеңесінің төрағасы Қожайхан Бижанов батасын берді.

«Елімізде жақсылықтар жалғасын таба берсін деген ниетпен әрбір игі істің бастамасын қариялардың батасымен бастаған ел азаматтарына рахмет», – деді Қожайхан Қазыбайұлы.

Кезектілік реті бойынша берілетін баспаналар алдағы уақытта да жалғасын табады дейді жауаптылар.

Қамар ҚАРАСАЕВА

Т.Рысқұлов ауданы