Облыс әкімінің орынбасары Серік Сәлемов бәсі биік бәсекелерде атой салған жамбылдық күрзі жұдырықты қыз-жігіттермен кездесті. Бексұлтан Боранбек, Дулат Бекбауов, Диас Молжігітов, Асылхан Көшербай, Анель Абдрасилов және Әйгерім Сәттібаева сынды саңлақтарымыздың қатысуымен өткен басқосу барысында өткен жылы дене шынықтыру және спорт саласында атқарылған толайым тірліктер баяндалып, алдағы меже айқындалды.
Серік Жақсылықұлы өз сөзінде Азия чемпионатында ұлттық құрама сапында өнер көрсеткен спортшыларымызды жеңісімен құттықтап, ел мерейін асырып жүрген спортшыларға аймақ басшылығы тарапынан арнайы сый-сияпат табыс етті. Өз кезегінде әулиеаталық боксшылар мен олардың жаттықтырушылары жергілікті билік өкілдеріне әркез көрсетіп жүрген қолдауы үшін шынайы ризашылығын білдірді.
Естеріңізде болса, былтырғы жылы Черногорияның Будва қаласында бокстан жастар арасында Әлем чемпионаты өткен еді. Дәл сол сында ел құрамасындағы күрзі жұдырықты жігіттеріміз 6 алтын, 1 күміс, 10 қола еншілеп, жалпы есепте көш бастады. Осылайша, жерлесіміз Бексұлтан Боранбек (51 кг) өз мықтылығын мойындатып, әулиеаталық жастар арасында тұңғыш рет Әлем чемпионы атанды. Ал, Қайрат Сәтжанов баптайтын бокстан ерлер құрамасы Тайландта өткен Азия чемпионатында 13 салмақта додаға түсіп, 10 медальді қанжығалады.
Айта кетейік, бүгінгі күнге дейін жамбылдық жампоздар республикалық және халықаралық түрлі жарыстарда 1 797 (658 алтын, 570 күміс, 569 қола) медальға ие болды. Бұдан бөлек, өткен жылдың қорытындысымен өңірде жүйелі түрде спортпен шұғылданушылар үлесі 41,2 пайызға жетті.
Есен ӨТЕУЛІ
Ұқсас жаңалықтар
