Іс-шарада ауданның Құрметті азаматы, аудандық ардагерлер кеңесінің төрағасы Байсейіт Жылысбаев алғаш сөз алып, аса көрнекті қоғам қайраткерінің өнегелі өмір жолына тоқталды. Осы ретте Байсейіт Жылысбаевтың мемлекет және қоғам қайраткері Мақсат Жылысбаевтың ұрпағы екенін айта кеткеніміз де жөн болар.

Жиында ауданның Құрметті азаматтары Серік Құралбаев, Бектұрған Жамбабаев естеліктер айтты. Белгілі композитор Сыдық Мұхамеджановтың жиені Айдар Әлібаевтың да лебізі көптің көңілінен шықты. Т.Рысқұлов аудандық тарихи-өлкетану музейінің директоры Эльдар Өтембаев та екі ауданның байланысы, жалпы Т.Рысқұловқа жасалып жатқан құрмет туралы айтты.

Іс-шара мақсаты – халқымыздың мақтан тұтар тұлғаларының өмірі мен ерлігін, қайраткерлігін дәріптеп насихаттауға, тарих парақтарынан тағылым алуға үйрету. Өмір жолындағы ерен еңбектерін елге насихаттау арқылы жас ұрпақты адал еңбек етуге, туған жерін қадірлеуге тәрбиелеу, қазақ халқының тарихи-мәдени мұрасын көпшілікке таныту болып саналды.

Шараның шымылдығы Тұрар Рысқұловтың қайраткерлігі туралы бейнефильммен ашылды.

Бұдан соң Меркі аудандық тарихи-өлкетану музей директоры, конференцияның модераторы Айдын Базилов сөз алды.

– Түркістан облысы әкімдігі және Қ.А.Ясауи атындағы Халықаралық қазақ-түрік университетінің ұйымдастыруымен Мемлекет және қоғам қайраткері Тұрар Рысқұловтың 130 жылдығына орай өткен жиында Мемлекет басшысы Қасым-Жомарт Тоқаев «Тұрар Рысқұлов – мемлекеттігімізді нығайтуға өлшеусіз үлес қосқан тарихи тұлға. Ол төл шежіремізге, ұлтымыздың болашағына қатысты көптеген мақалалар мен ғылыми еңбектер жазды. Күрделі кезеңде ел игілігі үшін аянбай қызмет етіп, талай игі бастамаға ұйытқы болды. Нәубет жылдары халықты аштықтан құтқаруға атсалысты. Қазақтың біртуар перзенті еліміздің егемендігі, түркі жұртының азаттығы жолында табанды күрес жүргізді. Тұрар Рысқұлов есімі тұтас Түркістан идеясымен тығыз байланысты. Оның түркі мемлекеттерінің бірлігіне қатысты идеясы әлі де өзектілігін жоғалтқан жоқ», – деген еді. Қайраткер жолы әр өскелең ұрпаққа үлгі, – деді ол.

Конференцияда зиялы қауым өкілдері мен тұрартанушылар келелі пікір мен ойлы ұсыныстарын жеткізді. Жыршы Бейбіт Шошабаев «Тұрар туралы» толғауын орындаса, аудандық мәдениет үйінің әншісі Сағыныш Аязбаева «Меркі» әнін орындады.

Конференция ашық пікір алмасумен жалғасып, баяндамашыларға облыс әкімдігінің мәдениет және тілдерді дамыту басқармасы тарапынан Алғыс хаттар табысталды.

Конференция соңында Тұрар Рысқұловтың экспозициялық бұрышы және «Тұрар Рысқұлов – қоғам және мемлекет қайраткері» тақырыбындағы көрме таныстырылды.

Студент жастар спикерлердің тың деректерінен тағылым алып, Тұрар Рысқұловтың өнегелі өмір жолы, халқына, ұрпағына қалдырған мол мұрасына көз жүгіртті.

Айман ЖҮРСІНАЛИЕВА,

аудандық тарихи-өлкетану музейінің бөлім меңгерушісі.

Меркі ауданы