Мемлекет басшысы Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты халыққа арнаған Жолдауында «Жайлы мектеп» жобасын ұсынғаннан кейін еліміздің түкпір-түкпірінде заманға сай жаңа мектептер бой көтере бастағанын айтқан болатын. Ұлттық жобаның бірыңғай операторы – «Samruk-Кazyna Сonstruction» компаниясы. Осылайша, апатты жағдайда тұрған және үш ауысымды мектептердің мәселесін шешудің төте жолы табылды.

Айта кетейік, бұған дейін Байзақ ауданының Сарыкемер ауылы мен Тараз қаласындағы «Бәйтерек» шағынауданындағы қос «Жайлы мектеп» ел игілігіне берілген еді. Бірер күн бұрын облыс орталығындағы «Ұлы дала» шағынауданында ұлттық жоба аясында бой көтерген №67 оқу ошағы оқушыларға есігін айқара ашты.

Білім беру нысанының сыйымдылығы 1200 оқушыға арналған. Жаңа мектептің салтанатты ашылу рәсіміне қатысқан облыс әкімі Ербол Қарашөкеев өскелең ұрпақтың сапалы білім мен тәрбие алуына қолайлы жағдай жасау – жергілікті атқарушы органдардың басты міндеті екенін баса айтты. Аймақ басшысы болашақта аталған оқу ошағынан білімді азаматтардың көптеп шығатынына сенім білдірді.

– Мемлекет басшысы Қасым-Жомарт Тоқаевтың тапсырмасымен Жамбыл облысының 85 жылдығы аясында өңірімізде үшінші «Жайлы мектеп» ел игілігіне берілуде. Қазіргі таңда «Жайлы мектеп» ұлттық жобасы еліміздің барлық өңірлерінде жүзеге асуда. Жалпы, жоба аясында облысымызда 12 мектеп салу жоспарланған. Сондай-ақ, облыста 2024 жылы құрылысы басталған 36 білім нысанының 10-ы пайдалануға берілді. Жыл соңына дейін тағы 5 мектептің құрылысын аяқтау көзделуде. Ал, 2025 жылы қосымша 26 білім ошағының құрылысы басталмақ, – деді Ербол Шырақпайұлы.

Шын мәнінде, аталған білім ошағы білім алушылар мен педагогтерге барлық жағдай жасалған. Мұндағы бастауыш сыныптар, негізгі және орта мектептер жеке блоктарға бөлініп, әрқайсысы заманауи оқу бөлмелерімен, әмбебап шеберханалармен жабдықт алған. Ғимаратта 256 орындық мәжіліс залы, 59 оқу кабинеті, 344 орындық асхана, 2 спортзал, 3 зертхана, 2 лингафон кабинеті, STEM, графика және жобалау кабинеттері, 10 коворкинг орталығы, робототехника зертханасы, 4 шеберхана, кітапхана, оқу залы мен 2 компьютер кабинеті бар. Ата-аналар да жаңа мектептің заманауи мүмкіндіктерін көзбен көріп, ұл-қызына жасалған жағдайларға шынайы ризашылықтарын білдірді.

– Өз басым 42 жыл ұстаз болып кызмет еттім. Қазіргі таңда зейнеткермін. Шүкір, 4 немерем бар. Бұған дейін балаларымды №37 мектепке апаратынмын. Жуырда осы мектепке ауыстырдық. Біріншіден, бұл «Жайлы мектеп» үйімізге жақын. Екіншіден, балаларды ауыстырмас бұрын ғимаратты аралап көрдік. Қатты ұнады. Балаларға барлық жағдай жасалған. Ұстаз ретінде айтарым, мұндай заманауи білім ошақтары оқушылардың толыққанды білім алуына мүмкіндік береді, – дейді Алмаш Кеңесқызы.

Ат ап өтерлігі, о сынау мектеп құрылысын «Integra Construction KZ» жауапкершілігі шектеулі серіктестігі жүргізсе, жобаның құны 6 миллиард 57 миллион теңгені құраған. Бұл күнде оқу ошағына №64 мектептен үш педагог ауысу тәртібімен қабылданса, 28 мұғалім конкурстық негізде жұмысқа орналасқан. Тараз қаласы әкімдігі білім бөлімінің басшысы Раушан Қожамжарованың айтуынша, дәл қазір облыс орталығында «Жайлы мектеп» жобасы аясында 4 мектептің құрылысы қарқын алған. Оның ішінде, №66 және №67 мектептер пайдалануға беріліп үлгерді. Бұдан бөлек, «Шөлдала» алабында 600 орындық, «Ұлы дала» ықшамауданындағы 2000 орындық мектептің құрылысы жүйелі жүргізілуде.

Есен ӨТЕУЛІ